Lesið fyrir líffræðipróf: III. hluti

Ef líffræði væri knattspyrnuleikur, færi sá leikur 0-0

Ef líffræði væri handboltaleikur, færi sá leikur einnig 0-0

Lesið fyrir líffræðipróf: II. hluti

Mér hefur ekki leiðst jafn mikið síðan ég var látinn læra einhverja fiska utanbókar fyrir Gettu betur.

Lesið fyrir líffræðipróf

Ég held að orð Sókratesar eigi best við um mig og líffræðina núna:

Ἓν οἶδα ὅτι οὐδὲν οἶδα (Það eina sem ég veit er að ég veit ekkert)

Fram þjáðir menn í þúsund löndum

Líffræðipróf á morgun.

Afmæli

Ég á afmæli í dag. Ég fékk kannski ekki alveg sömu hyllingu en ég er bara sáttur. 28. apríl er samt skrambi leiðinlegur tími til að eiga afmæli.

Mótmæli

Ég er almennt hlynntur mótmælum. Þó sumir vilja ávallt kalla þau skrílslæti tel ég þau vald fólksins. Því virði ég rétt vörubílsstjóra til að mótmæla þó mál þeirra sé mér nú ekki kært. Þó geta þau gengið of langt eins og þegar vörubílstjórar tepptu hlestu umferðaræðar við Borgarspítalann um daginn. Þessi mótmæli finnst mér ekki ganga of langt. Í raun finnst mér það bara hálf spaugilegt að þegar formaður heimastjórnar Palestínu er á Bessastöðum, þá mótmæla þeir. Gæti reyndar verið tilviljun, ég veit það ekki. En hvað ætli Abbas geri nú í tengslum við tolla ríkisins á bensíni hér á landi?

Án tiltils

Nei nei nei nei nei!!!

Málsháttur

Málshættirnir verða sífellt pólitískari með árunum. Ég fékk þennan málshátt í páskaegginu mínu:

Frjálslyndur maður getur orðið ráðherra, en ekki er víst að sami maður verði frjálslyndur ráðherra.

Það fyrsta sem mér datt í hug var Frjálslyndi flokkurinn. Það hefði verið svolítið fyndið að fá málshátt um einn ákveðinn stjórnmálaflokk.

Annars er ég að spá í að sækja um vinnu, næsta páska, við að semja málshætti fyrir páskaeggin.

Gleðilega páska!

Páskafrí

Ég sagðist kom með Gettu betur-uppgjör ef ég nennti. Ég nenni því ekki. Ég er kominn í páskafrí og nú nenni ég engu. Nú er líka kominn tími fyrir aðrar áhyggjur en Gettu betur. Ég þarf að gera enskuritgerð sem ég átti að skila á föstudaginn. Ég á mjög erftitt með að einbeita mér að henni. Páskafríið er virkilega letjandi.

GB: Sigur

Ég er feginn að GB sé lokið í ár. Keppnin endaði líka vel hjá okkur.
Við byrjuðum keppnina vel. 17-12 eftir hraðaspurningar gaf okkur góðan byr. Bjölluspurningarnar gengu líka betur en síðast. Við héldum aðeins lengur út en síðast. Allt stefndi í öruggan sigur þegar 7 stig voru eftir í pottinum. Í anda keppninnar í ár, þar sem allar keppnir voru spennandi, hirtu MA-ingar 7 síðustu stigin. Nú nenni ég ekki að velta mér upp úr síðustu bjölluspurningunni. Hún skiptir engu máli núna. Hins vegar sá ég eftir því að hafa ekki nefnt Verdi við félaga mína. Ég trúði því ekki að það væri verið að spyrja um hann. En bráðabani var staðreynd, annan árið í röð. Taugar mínar hafa eflst mikið síðan í fyrra. Ég efast um að ég hefði þolað það að missa niður 7 stiga forskot í fyrra. En við vorum bara góðir í bráðabananum. Náðum fyrstu spurningunni og settum pressu á MA-ingana. MA-ingar fóru allt of snemma á bjölluna í næstu spurningu og eftirleikurinn því auðveldur fyrir okkur.

Að lokum vil ég þakka MA-ingum fyrir góða keppni. Ef ég nenni, þá kem ég með smá uppgjör um keppninga í ár.

Sigur og tap í gærkvöldi

Úrslitin eru nú framundan eftir nauman sigur í gær gegn Borgarholtsskóla. Þrátt fyrir að hafa góða forystu lengst af vorum við næstum því búnir að kasta frá okkur sigrinum.

Við byrjuðum vel. Náðum okkar besta hraðapakka hingað til. Hann var næstum því fullkominn. Eftir vísbendingarnar höfðum við svo fjögurra stiga forystu sem þó hefði getað verið meira enda höfðum við séð það fyrir að spurt yrði um regnboga.
Bjöllubardaginn var hins vegar slæmur. Við byrjuðum illa þar með því að fara of snemma á bjölluna án þess að hafa greint eyjuna almennilega. Þó náðum við góðri siglingu þegar við náðum þremur bjölluspurningum í röð og eftir sem bjölluspurningar var staðan 27-21. Skemmst er frá því að segja að stigin okkar urðu ekki fleiri. Við urðum allt of bráðir í kjölfarið og fórum of snemma á bjölluna þrisvar í röð. Svo þegar við ákváðum að fara varlega tóku Borghyltingar stigið.
Ég ætla ekki að æða mörgum orðum um hláturinn, ég veit að við þrír vorum þeir einu í salnum sem vorum ekki búnir að fatta svarið eftir tvær vísbendingar. Ég hélt svo að við værum endanlega búin að kasta sigrinum frá okkur þegar við náðum ekki þríþrautinni. Sem betur fer náðu Borghyltingar ekki þrautinni svo þannig fór sem fór, 27-26.
Ég vil þakka Borghyltingum fyrir spennandi keppni. Þeir voru góðir í ár, því er ekki að neita.

Annars er það að frétta að ég bauð mig fram til scribu scholaris (ritara skólafélagsins). Til að gera langa sögu stutta, þá tapaði ég.

GB: 26-23

Það er gott að vera búnir með erkifjendur okkar úr Verslunarskólanum. 26-23 eru ágætis úrslit. Hraðinn var allt í lagi fyrir utan fyrstu og síðustu spurninguna sem var hálfgerður klaufaskapur. Ég er sáttastur með bjölluspurningarnar þar sem við fórum alltaf á réttum tíma á bjölluna og náðum góðu forskoti á Verslinga. Við hefðum þó mátt fara fyrr á bjölluna í vísbendingaspurningunum um Norðurljósin og Nebúkadnesar. Verst að ég misheyrði síðarnefndu vísbendingaspurninguna. Mér heyrðist hann spyrja um konu í staðinn fyrir konung og þess vegna var ég farinn að renna yfir konur úr Gamla testamentinu í huganum.

Vetrargerðurinn í Smáralindinni er ekki góður keppnisstaður. Illa heyrðist í Sigmari þegar hann las hraðaspurningarnar fyrir okkur. Kliður heyrðist úr Smáralindinni og auk þess heyrðist í útsendingunni sem var örfáum sekúndum á eftir. Einnig voru of fá sæti þarna. En það var óneitanlega gaman að fá tækifæri til að skjóta á Kópavog fyrir framan hálfa þjóðina.

Annars þakka ég Verslingum fyrir góða keppni.

Án titils

Mitt íslenska hjarta fyllist stolti þegar...

Nema hvað

Ég vil óska Hagaskóla til hamingju með sigurinn í Nema hvað, spurningakeppni grunnskólanna. Það er ánægjulegt að Mímisbrunnurinn sé kominn aftur á réttan stað.

GB: 25-11

Þá höfum við tryggt okkur sæti í 8-liða úrslitum eftir öruggan sigur á Menntaskólanum á Ísafirði. Ég hef lítið um þessa keppni að segja nema að það var frekar slakt af hálfu dómara að koma með sömu hraðaspurningu tvær keppnir í röð og Kántrý-tónlist er, að mínu mati, frekar leiðinleg tónlist. Annars var ég sáttur með okkar frammistöðu og stuðningsmenn okkar þ.e.a.s. þessa 20 sem mættu.

GB: Breytt áætlun!

Það er búið að draga upp á nýtt. Við mætum Menntaskólanum á Ísafirði næsta mánudagskvöld!


*Upphafleg færsla*

Við fáum Kvennaskólann í 2. umferð í Gettu betur, annað árið í röð. Í fyrra mætti Kvennaskólinn með ágætis lið en enn þeirra er núna eftir. En það er líka alltaf stemning að keppa á móti nágrannaskóla. Keppnin fer fram miðvikudaginn kl. 19.30 í Útvarpshúsinu. Allir að mæta!

GB: 33-7

Árið 2008 byrjar bara nokkuð vel hjá okkur. 33-7 verða að teljast bara nokkuð góð úrslit. Hins vegar var ég ekki sáttur með hraðann. Ég klúðraði einni biblíuspurningu snemma í hraðanum og sat það svolítið í mér í næstu spurningum þar á eftir en ég var mjög lengi að taka Börn náttúrunnar og Galdhøpiggen, en svörin komu þó á endanum. Einnig var það mjög klaufalegt að segja Hvammsfjörður í staðin fyrir Hvammstanga. Þrátt fyrir það eru 16 stig ágætis árangur á 80 sekúndum. Hins vegar finnst mér hraðinn aðeins of stuttur. Bjölluspurningarnar voru góðar hjá okkur, 13 stig af 16, auk fjögurra stiga úr tóndæmum. Þetta var í fyrsta skipti frá því að ég hóf leik í Gettu Betur fyrir tveimur árum, að við náum ekki meirihluta stiga okkar úr hraðanum.
En í heildina litið var ég bara sáttur við þessa keppni.

Gleðileg jól

Jólin eru gengin í garð og ég er kominn í fullt jólaskap. Að syngja í miðbænum á Þorláksmessu kemur mér alltaf í jólaskap og svo er alltaf jafn notalegt að fara í messu kl. 18.00 á aðfangadegi jóla. Jósef virðist vera vinsælt predikunarefni (1,2) þetta árið. Og svo er það kvöldið sem maður eyðir með fjölskyldunni, borðar jólasteik og möndlugraut og skiptist á gjöfum. Svo til að krydda jólaskapið endanlega, þá voru götur borgarninnar þaktar snjó í morgun. Að mínu mati er snjór ómissandi jólaskraut, hvíti liturinn setur mjög skemmtilegan blæ á borgina. Ég ákvað að taka hundinn út í göngutúr til að njóta snjósins á meðan hann endist. Nú er bara um að gera að njóta jólanna á meðan þau vara.

Að lokum vil ég óska ykkur öllum gleðilegra jóla!

Einkunnir og GB

Það er alltaf ljúft að komast í jólafrí. Einkunnir voru afhentar í dag. Ég rétt klóraði mig upp í fyrstu einkunn með 7,5 í meðaleinkunn. Ég get vel við unað enda hef ég ekki sinnt náminu að neinu viti. Sáttastur er ég með að fá 9 í grísku, einnig er ég sáttur með að fá 8 í fornfræði og latínu (eins og venjulega). Einkunn mín í líffræði telst ekki glæsileg en þó er ég sáttur með að sleppa með 5. Hins vegar er ég ósáttastur með einkunn mína í stærðfræði þar sem ég fékk 7,5. Þrátt fyrir að ég hafi lagt mjög lítið á mig í stærðfræði í vetur verður málabrautastærðfræðin seint talin erfið. Í hnotskurn er ég bara í miðjumoðinu þegar kemur að einkunnum, þær eru hvorki of góðar né of slæmar (fyrir utan líffræði og enskan stíl). Í raun er slíkt miðjumoð lítil hvatning til náms. Annars stefni ég á að fara aldrei niður í aðra einkunn.

Annars eru helstu tíðindin þau að það er búið að draga í Gettu Betur. Við ríðum á vaðið 7. janúar þegar við keppum á móti Verkmenntaskóla Austurlands. Ég er bara nokkuð sáttur við það. Annars er ég ekki sáttur við hvað mogganum finnst gaman að setja inn hirðfíflsmyndina af mér.

Jólalag og jólapróf

Sama gamla sagan. Það er löngu búið að þjófstarta jólunum og ég hálfpartin búinn að venjast þeim. Ég er hins vegar búinn að skrifa nóg um það í gegn um tíðina. Prófin eru farin af stað og klárast eftir rúmlega viku. Jólin eru því enn nokkuð fjarri. Ég finn þó keim af jólaskapi í mér þessa dagana þrátt fyrir allt þetta. Í prófunum hef ég hlustað mikið á eitt jólalag, Ó helga nótt, í flutningi Jussi Björling (O helga natt, kallast það á sænsku). Það þarf víst ekki nema eitt lítið jólalag (það getur reyndar ekki verið hvaða jólalag sem er) til að veita sálarró í jólaprófunum. Reyndar hef ég verið aðeins of kærulaus í jólaprófunum en það er önnur saga.

Viðbót: Smá snjór, með sinn hvíta blæ, spillir heldur ekki fyrir.

Án titils

Ég er ekki frá því að það hafi verið mistök að velja frönsku frekar en þýsku, þegar ég byrjaði í MR. Ég var að undibúa mig í dag fyrir munnlegt próf í dag þegar það rann upp fyrir mér að í eina skiptið, sem ég hef svarað spurningu frá kennaranum upphátt (nema, auðvitað, þegar ég er tekinn fyrir), þá svaraði ég: "Sauerkraut!"

Að þýða orð Guðs

Í kvöld horfði ég á kastljósið þar sem Sr. Hjörtur Magni Jóhannsson og Sr. Geir Waage körpuðu um nýja Biblíuþýðingu. Ég ætla ekki að fara að mynda mér skoðun strax um þessa nýja Biblíuþýðingu enda hef ég ekki kynnt mér hana að ráði. Ég hef í raun lítið meira en rök prestanna til að byggja á. Ég get hins vegar engan vegin verið á móti nýrri Biblíuþýðingu heldur fagna ég henni. Í raun lít ég á hana sem merki um það að Biblían sé í stöðugri endurskoðun og er því í raun mjög lifandi. Það er ekki hægt að nema staðar og segja eina þýðingu þá einu réttu og því ætti ekki að þýða hana á ný. Í gegnum aldirnar hafa þýðingar verið rangar og er Vulgata , latnesk þýðing Bilblíunnar, eflaust þekktasta dæmið um það. Til að fá réttustu útkomuna verða menn ef til vill bara að læra hebresku og forn-grísku.


Það var áhugavert að heyra Geir Waage tala um hátíðleika málsins í gömlu þýðingunni. Ég er nokkuð vanur þessum hátíðleika og get varla ímyndað mér hvernig er að lesa hana með venjulegu nútímamáli. Því er ég nokkuð spenntur að sjá hana. Mér finnst t.d. mjög forvitnilegt að sjá hvernig rit eins og Ljóðaljóðin koma út í nýju þýðingunni.

Svo er það líka alltaf áhugaverð spurning hvernig Biblían kæmi út skrifuð nú til dags. Það er ekki hægt að neita því að Biblían litast töluvert af tíðaranda þó kjarni boðskapsins sé tímalaus. Því finnst mér allt í lagi að bæta systrunum við sé það tekið fram hvernig upprunalega þýðingin var. Biblían er líka fyrir konur þó hún virðist ekki hafa verið það fyrir 2000 árum.

Gamla þýðingin verður líka enn til staðar svo hægt er að velja á milli. Ætli það sé ekki einstaklingsbundið hvaða þýðingu fólk kýs að nota. Hvora þýðinguna ég kýs að nota verður bara að koma í ljós.

Að eiga sér e-ð heilagt

Ég var að horfa á Kastljósið og Ísland í dag síðan í gær, á netinu. Það var umræðan um símaauglýsinguna sem ég fylgdist með. Hvað hana sjálfa varðar finnst mér asnalegt að nota svona vöru til að auglýsa síma. Annars hneykslaði hún mig ekki mikið, ég er víst ekki meiri trúmaður en svo. Ég skil það hins vegar að hún hneyksli trúað fólk, fyrir þeim er sagan heilög. Mönnum ber því að taka tillit til þeirra. Skoðannir þeirra eru heldur ekki trúarofstæki eins og einn gaur, sem fréttamenn frá Stöð tvö töluðu við, orðaði það . Tjáningafrelsið er gott og gilt en engu að síður vandmeðfarið.

Ég lít á þetta sem lítið dæmi í víðara samhengi. Það fyrsta sem mörgum dettur eflaust í hug þegar ég segi víðara samhengi er stóra Múhammeðsskopmyndamálið. Þar fannst mér báðir aðilar ganga of langt, Jótlandspóstinum bar að virða það sem múslimum fannst heilagt en á hinn bóginn brugðust sumir (NB! sumir, ekki allir) múslimar of harkalega við, svo vægt sé til orða tekið. Ég held að hvorugir aðilar hafði reynt að skilja hvernig hinn hugsaði. Það er grundvallaratriði til að svona deilur stigmagnist ekki.

Þetta samhengi sem ég tala um nær víðar en um trúarbrögð. Það eru til margs konar gildi sem fólk hefur í heiðri; pólitísk, samfélagsleg o.s.frv. Það eru líka gildi sem ber að hafa í huga. Það er alvegt hægt að vera ósammála en þó skal varast að traðka á annarra manna gildum. Það getur verið góð tilfinning að eiga sér e-ð heilagt. Að hafa einhvern/eitthvað sem hægt er að líta upp til og halda í heiðri. Því er leiðinlegt að sjá þau skotin niður, hvort sem það er af illkvittni eða hugsunarleysi. Ég geri mér samt grein fyrir því að gildi er svolítið loðið hugtak og það er hægt að teygja þetta víða samhengi, sem ég tala um, út í öfgar. Má þar nefna stjörnudýrkun á einhverjum sem getur verið mjög óheilbrigð.

Það er fleira sem hægt er að nefna við símaauglýsinguna sjálfa, t.d. nútímatrúboð Jóns Gnarrs, en ég læt þetta nægja í bili.

Mánudagsgrískutímar

Eitt það skemmtilegasta við stundartöfluna okkar eru grískutímar á mánudögum. Þeir fara fram í hátíðarsalnum. Við erum sex í tímunum og röðum við okkur fremst í salinn, beint fyrir framan málverkið af Sveinbirni Egilssyni, fyrsta rektor skólans, sem var grískumaður mikill og þýddi m.a. Hómerskviður yfir á íslensku. Það gerist varla fínna á stundartöflunni.

Bobby og kvikmyndahúsin

Ég fór í kvikmyndahús um daginn að sjá Harry Potter and the order of phoenix. Það allra merkilegasta fannst mér að sjá Bobby Fischer á aftasta bekk í salnum. Mér datt nú ekki í hug að hann væri mikill Harry Potter aðdáandi. Gæti samt alveg verið. Hann gæti þó líka hafa verið sofandi á sýningunni. Ég ætla samt ekki að fullyrða það þar sem ég var nú að fylgjast með myndinni en ekki honum. Spurning hvort hann stundi það að fara á óáhugaverðar myndir (að hans áliti, ég hef nú alveg einhvern áhuga á Harry Potter) til þess sofna. Gott ráð við svefnleysi?
Annars vil ég lýsa yfir aðdáun minni á Bobby Fischer, hann er svo yndislega sérvitur.

Lögmálið um draslið

Sama hversu mikið þú reynir að losa þig við drasl, það kemur alltaf aftur.

Fyrirmyndarbærinn Springfield

Ef það eru einhverjir sjónvarpsþættir sem ég er veikur fyrir, þá er það The Simpsons. Þættirnir eru í senn mjög fyndnir og innihalda einnig mikið af siðferðisstefum sem gætu gagnast manni í daglegu lífi (réttlæting fyrir of miklu Simpsons-glápi)
Eitt af því sem gerir þættina mjög áhugaverða er samfélagið í bænum sem þættirnir fjalla um. Þættirnar lýsa því einmitt hvernig bæir eiga ekki að vera. Bæjarstjórinn spilltur, lýðurinn fáfróður og æsist auðveldlega upp, auðmaður á hálfan bæinn og svona mætti lengi telja. Það verður því að teljast nokkuð kaldhæðnislegt að íbúar 14 bæja í bandaríkjunum keppist um að fá sinn bæ viðurkenndan sem heimabæ Simpson-fjölskyldunnar. Hvernig ætli íbúar Springfield í Vermount-fylki hafi samfært fólk um að þeirra bær sé hinn eini sanni Springfield-bær? Var það múgæsingin? Að vísu tel ég að bærinn muni nú ekki fá á sig neikvæðan stimpil þrátt fyrir allt, þættirnir eru of vinsælir til að svo verði.

Annars bíð ég með eftirvæntingu með myndinni. Það verður líka forvitnilegt að sjá hvernig myndin heppnast á íslensku. Ég hef nú séð þátt á þýsku þannig að ég held að íslenskan muni ekki spilla fyrir neinu. Ég ætla samt sem áður að sjá myndina fyrst á ensku.

Wikipedia: Random article

Á forsíðu Wikipedia má finna tengil sem vísar á síðu valda af handahófi. Ég ákvað að smella 10 sinum á tenglin og gá hvað kom út. Líkurnar á því að finna einstaka grein, t.d. um Ísland, eru 1 á móti 1.841.107 (þegar þetta er skrifað). Þetta eru niðurstöðurnar:

1. http://en.wikipedia.org/wiki/Joy_to_Great_Caesar: Það fyrsta sem ég fæ hér út er anti-kaþólskur söngur frá tíma Karls II. Passar vel við mig sem mótmælanda.
2. http://en.wikipedia.org/wiki/Andrei_Sychov: Rússneskur hermaður, þremur árum eldri en ég sem er þekktur fyrir að hafa pínt samherja sína. Ekki líst mér nú á það
3. http://en.wikipedia.org/wiki/People/crowd_watching: Ég stunda nú ekki mikið af þessu. Það er þó svo sem ekkert að því að rýna í annað fólk og spá í hvernig það lifir. Gera menn það ekki bara í félagsfræði?
4. http://en.wikipedia.org/wiki/Ramularia_primulae: E-t sveppadæmi, ég veit ekki alveg hvað þetta er - og ég hef engan áhuga á því að vita hvað þetta er.
5. http://en.wikipedia.org/wiki/1959_Tour_de_France: Ég ætla nú ekki að sérhæfa mig of mikið í Tour de France þó keppnin sé áhugaverð sem slík. Að þekkja úrslitin síðan 1959 er aðeins of mikið.
6. http://en.wikipedia.org/wiki/Consubstantiation: Önnur guðfræðitengdagreinin sem rekst á. Spurning um að skella sér í guðfræðina eftir MR.
7. http://en.wikipedia.org/wiki/Trapped_%282002_film%29: Ég held að ég láti það vera að horfa á þessa mynd.
8. http://en.wikipedia.org/wiki/M107: Vúhú, ég fæ að velja. Ég vel þessa grein, enda eina af þeim sem ekki tengist hernaði.
9. http://en.wikipedia.org/wiki/Viscount_Cullen: Spurning um að endurvekja þennan titil. Björn Reynir Halldórsson, 7th Viscount Cullen. Nei, held ekki.
10. http://en.wikipedia.org/wiki/Blackout_%28David_Bowie_song%29: Ég hlusta stundum á David Bowie. Lagið þekki ég hins vegar ekki.

Ég náði að fiska alla vega e-ð áhugavert út úr þessara tilraun. Hvort að þekking þessi komi mér að gagni verður að koma seinna í ljós. Ég hvet aðra bloggara að gera slíkt hið sama og setja niðurstöðurnar á bloggið. Það gæti orðið mjög forvitnilegt.

Stórfréttir á RÚV

Eru allar fréttir á RÚV orðnar stórfréttir? Svo virðist sem að í hverjum einasta fréttatíma sé fréttamaður í beinni útsendingu á vettvangi. Áður fyrr voru fréttamennirnir á vettvangi í beinni þegar þeir fjölluðu um stórátök á Alþingi, t.d. fjölmiðlamálið eða stórfréttir á borð við þegar Bobby Fisher kom til landsins (reyndar finnst mér það ekki ýkja stór frétt en engu að datt mér ekkert betra í hug). Í fréttatímunum í kvöld var fréttamaður í beinni á víkingahátíð í Hafnarfirði. Er það stórfrétt? Eða Grafarvogsbúar óánægðir með svefnlyf fyrir máva?
Er það kannski bara afstætt hvaða fréttir teljast sem stórfréttir og hverjar ekki?

Sumarið kemur með fyrsta rigningardropanum

Það er alltaf ljúft að komast í sumarfrí. Prófin gengu ágætlega, ég fékk 7,8 í meðaleinkunn eins og ég bjóst við. Hroki minn gagnvart frönskunni var líka tónaður niður þar sem ég fékk 6 sem var lægsta einkunin mín. En umfram allt er ég bara sáttur við prófin.
Ég er hins vegar núna að vinna í Fossvogskirkjugarði. Ég er mikill bjartsýnismaður og mæti alltaf með sólarvörn upp á 20, í vinnuna. Það er ekki mikil þörf fyrir hana enda byrjaði að rigna um leið og júnímánuður gekk í garð. En vinnan er ágæt, góða veðrið kemur bara síðar.

Ég hef verið að hugsa um að gerast líffæragjafi. Hollenska gabbið virkar mjög vel. Ég varð mjög hneykslaður þegar ég heyrði fyrst um þáttinn þar sem það er ekki siðlegt að nýta sér neyð sjúklinganna og gera úr því söluvöru. Í fordómum mínum hugsaði ég: „Dæmigert fyrir Hollendinga!“ Mér fannst gabbið hins vegar sniðugt enda vakti það fólk virkilega til umhugsunar. Ég spyr bara hvar sé hægt að skrá sig sem líffæragjafi?

Læt þetta bara duga í bili

Lýsi eftir huga mínum!

Hefur einhver séð hugann minn? Ég týndi honum einhvern tímann í dag á bilinu 13.00 til 18.00 þegar ég var að læra fyrir próf í líffræði (með hléum). Svo virðist sem hugurinn minn hafi farið á flakk á þessum tíma á meðan ég sat sjálfur yfir námsefninu í líffræði og nú finn ég hann ekki aftur. Þeir sem hafa séð hugann minn á reiki láti mig vita. Fundarlaun í boði!

Hið ljúfa líf heimiliskattarins

Stundum ímynda ég mér hvernig það sé að vera heimilisköttur. Ég læt mig dreyma um hið ljúfa líf heimiliskattarins sem þarf ekkert að gera. Hann ráfar bara um húsið, finnur sér góðan stað og fær sé blund eða grípur í eitthvað bitastætt sé matur fyrir hendi.

Þegar prófin standa yfir komast þessir dagdraumar ansi nálægt veruleikanum mínum.

Millibilsástand

Gettu betur er búið, eiginlega löngu búið. Það þýðir að ég hef enga afsökun fyrir að læra ekki heima. Samt læri ég ekki heima. Ég nenni því ekki. Ég komst vel í slökunargírinn í páskafríinu, sem ég eyddi að mestu leyti í Danmörku, og hef ekki komið mér úr honum síðan. Í skólanum ríkir nokkurs konar millibilsástand. Félagslífið er nánast búið á þessum vetri (nema fyrir 6. bekkinga) og vorpróf bíða en þau hefjast 4. maí. Þangað til nenni ég ekki að læra enda læri ég hvort sem er best fyrir próf (hver gerir það ekki).

Kórinn er þó enn starfandi. Vortónleikarnir eru einmitt á sunnudaginn kl. 20.00 í Seltjarnarneskirkju. Fínt að hafa eitthvað að gera eftir allt. Hvet fólk til að mæta á tónleikana, 1000 kr. inn.

GB: Hljóðneminn heim

Þá hefur tveggja vetra starf loksins skilað sér, við erum búnir að vinna Gettu betur. Keppni gærkvöldsins var mjög spennandi og skemmtileg. MK-ingar sýndu að þeir væru hörkulið, sýnd veiði en ekki gefin.

Keppnin minnti mig svolítið á viðuregn okkar gegn MA í fyrra. Náðum góðri forystu í hraðanum en misstum hana svo eftir tvær vísbendingaspurningar. Við tók strembinn bjöllubardagi þar sem ekkert gekk upp eftir að við vorum komnir með 23 stig og tap virtist blasa við þegar ein vísbendingaspurning og þríþraut voru eftir. En ólíkt keppninni í fyrra náðum við þríþrautinni og knúðum fram bráðabana þar sem við tókum tvær spurningar í röð og sigruðum að lokum 29-27.

Í svona jafnri keppni hefði sigurinn getað fallið báðum meginn og tapliðið hugsar um e-ð eitt sem fór úrskeiðis. Í raun er alltaf e-ð sem bæði lið hefðu getað tekið. Ég var örlítið svekktur að taka ekki Jóhannesarguðspjall í hraðanum og svo að láta MK-ingana hirða fjallagrösin af okkur. En það kom ekki að sök því heppnin var með okkur í gær. Við áttum alveg skilið smá heppni eftir að hafa verið óheppnir í fyrra.

MK-ingarnir eiga svo sannarlega hrós skilið. Ég átti aldrei von á því að þeir myndu veita okkur hörðustu keppnina í ár. Liðið bætti sig töluvert eftir því sem á keppnina leið og skutu okkur aldeilis skelk í bringu. Takk fyrir góða keppni.

Gettu betur er þá bara lokið í ár og lauk ánægjulega fyrir okkur. Ég er bara mjög glaður, get ekki sagt annað. Veturinn hefur verið skemmtilegur og gaman að sjá þetta markmið okkar verða að veruleika. Ég segi bara: Takk fyrir mig!

GB: Sigur gegn Versló

Ég er enn í hálfgerði sigurvímu núna. Það er ekki leiðinlegt að leggja Verslunarskólann að velli með tíu stiga mun, 37-27. Ekki síst vegna þess að það er nú nokkur rígur á milli. En rígurinn er að sjálfsögðu grafinn eftir keppni. Verslingarnir voru bara nokkuð góðir. En við vorum bara betri. Við erum á fljúgandi siglinglu og færumst skrefi nær hljóðnemanum. Annars segi ég bara: Takk fyrir góða keppni, Verslingar.

Án titils

Ég væri til í að sjá svona póstkassa í Reykjavík.

GB: Góður sigur í gær.

Ég get ekki annað en verið sáttur með okkur í gær. Að ná 38 stigum er bara frábært, að vísu hefði verið skemmtilegt að fara yfir 40 stiga múrinn en það skiptir svo sem engu máli. Við áttum líka mikið inni síðan í fyrra en þá náðum við ekki að sýna okkar rétta andlit. Einnig er MS-ingum þakkað fyrir góða keppni.

Ég var bara almennt sáttur við spurningarnar. Septuaginta-spurningin var að vísu umdeild en ég var hins vegar nokkuð óskýr þegar ég svaraði. Í raun vissi ég ekki hverju ég átti að svara og var næstum því farinn að segja grísk þýðing á Gamla testamentinu, sem hefði verið óþjált í hraða. Það var líka nokkuð skemmtilegt að fá aftur spurningu um Burkina faso. Minningar helltust yfir mig og ég vildi ekki láta andstæðingin hirða svarið aftur af okkur.

Undanúrslitin eru svo bara næst á dagskrá. Það er ágætt að vera kominn yfir fjórðungsúrslitin, þar sem við duttum út í fyrra. Þá verður forvitnilegt að sjá hvort við fáum MK, versló eða MH/ME. Annars er okkur bara sama. Við ætlum bara að halda áfram á þessari braut.

Netlögga

Steingrímur J talar um að koma á fót netlöggu. Ég held að allir nafnlausu netdólgarnir sanni það bara að hann hafi rétt fyrir sér.

Klám í Reykjavík?

Það hefur vart farið framhjá nokkrum að klámráðstefnu á að halda hér. Það eru líka flestir sammála um að þetta sé ekki boðlegt siðbrúðum mönnum. Samt er hægt að deila um þetta mál. Sumum finnst sjálfsagt að leyfa þessu fólki að koma hingað og halda þessa ráðstefnu. Mér finnst það hins vegar ekki. Þetta er ekki eins og hver önnur ráðstefna. Hér er fólk að koma saman til að ræða um, versla með og jafnvel framleiða efni sem er siðlaust og ómannlegt. Það er ekki mannlegt að gera mannslíkama að söluvöru þar sem annað (í langflestum tilvikum kvenkynið) er niðurlægt. Aldrei myndi nokkur leyfa þessu að viðgangast væri um fíkniefni að ræða.
Þá er það spurningin hvað er hægt gera við þetta fólk. Um það er hægt að deila. Mér finnst sjálfsagt að synja þessu fólki um að koma til landsins í þessum tilgangi í stað þess að bíða að lögbrot verði framið. Þó að fólkið eigi svo sem rétt á að heimsækja landið eins og aðrir þá verður það bara að vera á öðrum forsendum.

Sniðug hugmynd.

Að skrifa sniðugar hugmyndir á blað áður en að ég gleymi þeim.

Nafnaritgerð

Ég var búinn að gleyma því hvað ættfræðin væri skemmtileg.

Án titils

Gamla góða frestannahneigðin!

Án titils

Mikið þoli ég ekki tölvunarfræðitíma.

GB: MS næst

Það má segja að við höfum tekið Lækjargötuslaginn nokkuð sannfærindi en að Kvennaskólinn hafi jafnframt tapað með reisn. Þeim er að sjálfsögðu þakkað fyrir góða keppni. Einnig er stuðningsmönnum þakkað fyrir að fjölmenna og halda uppi rífandi stemmingu í útvarpshúsinu. 30-20 voru sem sagt úrslitin.
En næstir á dagskrá eru MS og fer keppnin fram 9. mars. Ég er strax farinn að hlakka til.

GB: 2. umferð og GB-bloggsamfélagið

Það er búið að draga í aðra umferð. Mótherji okkar að þessu sinni verður Kvennaskólinn í Reykjavík. Mér líst bara vel á að fá Kvennskælinga sem mótherja. Áhugaverðasta viðuregnin í þessari umferð er þó að mínu mati Borgó-MH. Tvö lið þar á ferð sem eiga heima í sjónvarpinu og annað þeirra dettur út.
Ég er farinn að hlakka til að hefja leik enda er keppnin sjálf komin á fullt skrið. Ég fylgdist lítið með fyrstu umferðinni þar sem við hefjum leik í annarri umferð. Ég hef ekki hlustað á keppninirnar en á þær ætla ég að hlusta bara á einu bretti á netinu. Ég hef þó fylgst með umræðum í bloggheiminum. Það er gaman að sjá þetta bloggsamfélag sem rís í kring um þessa keppni. Ég vafraði um það um daginn og sá tengla á síðuna mína á þremur vefdagbókum hjá mönnum sem ég þekki lítið og jafnvel ekki neitt. En ég lít bara á það sem tækifæri til að kynnast fleirum. Ég hef gefið hinum sömu tengil til baka eins og ég geri alltaf. Ætli ég verði þá ekki að blogga meira um GB.

Annars hvet ég alla til að mæta í útvarpshúsið næsta miðvikudagskvöld kl. 20.30.

Merki um taugaveiklun?

Ég tek alltaf svakalegan kipp þegar síminn hringir eða ber mér smáskilaboð, jafnvel þegar ég á von á þeim.

GB: Fjörinu frestað um viku!

Við sitjum hjá í fyrstu umferð.

Þorláksmessuhugleiðingar ´06

Ég hef ákveðið að hafa það að venju að rita hugleiðingar mínar á Þorláksmessu hér á bloggið mitt. Hugarfar mitt núna er eiginlega bara svipað og á Þorláksmessu í fyrra. Ég er allt í einu farin að átta mig á því að jólin eru á morgun. Þorláksmessa er einmitt sá dagur þar sem ég dett inn í jólaskapið. Sérstaklega þegar ég er staddur í miðbænum með MR-kórnum syngjandi jólalög. Ég verð að segja að þetta er mjög góð hefð og gott fyrir fólk, sem er á fullu við jólainnkaup, að slaka aðeins á, staldra við og hlusta á ljúfan kórsöng.
Einnig er gaman að kíkja á mannlífið á Þorláksmessu. Nóg er af fólkinu á Laugarveginum. Ég held líka að það væri ágætis hugmynd að banna umferð bifreiða á Laugarveginum og gera hana að göngugötu á Þorláksmessu. Í raun furða ég mig á því að fólk nenni að keyra þar.

Ég ætla ekki að hafa hugleiðingar mínar lengri að þessu sinni og óska ég ykkur öllum gleðilegra jóla.

Jólatónleikar

Jólatónleikar MR-kórsins voru haldnir áðan og heppnuðust bara býsna vel. Tónleikarnir hlutu einróma lof áhorfenda sem ómuðu af gleði. Við uppskárum eins og við sáðum og eftir miklar æfingar og mikla taugaþreytu á síðustu metrunum tókst okkur að skila efninu bara vel frá okkur. Þar bar hæst "A Ceremony of Carols" eftir Benjamin Britten við fagran undirleik Sólveigar á hörpu.
Fyrir þá sem misstu af veislunni, þá verðum við í miðbænun á Þorláksmessu ef veður leyfir.

Að lokum vil ég hvetja MR-inga til að ganga í kórinn eftir áramót.

Án titils

Ég þakka heiðurinn

Að læra (ekki) fyrir próf.

Það gleðjast ekki margir yfir jólaprófum. Ég geri það nú ekki beinlínis en tek þeim þó með ró. Ef til vill aðeins of mikilli. Það má segja að ég sé kominn í nokkurs konar vítahring letis og þreytu. Ég hef aldrei verið svona latur í jólaprófum fyrr. Augnlokin þyngjast er ég opna námsbækurnar. Ég er vís til að fá mér blund, kíkja á netið (hvað er ég að gera núna), fá mér eitthvað nasl o.s.frv. Svo er ég alltaf syfjaður. Kaffið er á þrotum á það sinn þátt í því. Ég er einn heima og nenni ekki út í búð að kaupa mér meira kaffi. Ég er farinn að finna fyrir fráhvarfseinkennum. Ég er farinn að halda að kaffileysið sé uppspretta vítahringsins.

Nú halda eflaust einhverjir að ég sé á hálum ís. Svo er ekki, mér hefur hingað til gengið ágætlega enda hef ég tilhneigingu til að bjarga mér á prófum.


Hver væri ekki til í einn svona kaffibolla?

Án titils

Af hverju eru alþingismenn að eyða tíma í þetta

Majónesjól

Er hægt að finna verri titil á jólaplötu?

Án titils

Hversu oft ætli fjölskyldumeðlimir hafi líkt mér við Grím Thomsen?

Árstíðirnar fimm

Nú er komið að mínum árlega jólanöldurspistli. Nóvember er rétt byrjaður og jólaauglýsingarnar eru farnar að láta sjá sig í blöðunum. Í matvöruverslunum er nú boðið upp á jólasmákökur og malt-appelsín blönduna. Ikea og slíkar verslanir eru líka farnar að vera ansi jólaskrautlegar á þessum tíma. Reyndar minnir mig að ástandið hafi verið verra í fyrra. Það breyir því hins vegar engu að ég sé mér þörf til að nöldra. Það á ekki að byrja að auglýsa fyrir jólin í október. Það á að byrja á fyrsta sunnudag í aðventu. Þegar jólaauglýsingar byrja svon snemma dregur það úr hátíðleika jólanna þegar þau loksins koma. Þau verða orðin ansi hversdagsleg. Ég er farinn að spyrja mig hvort jólin séu hátíð eða árstíð sem hefjast seinni partinn í október,ná hámarki á jóladag og lýkir snemma í janúar? Það liggur við að hægt sé að tala um árstíðirnar fimm: Vetur, vor, sumar, haust, jól.

Tilbúinn kjúklingur

Ég er búinn að vera einn heima þó nokkrum sinnum síðustu daga. Þá er það alltaf sama spurningin: „Hvað á ég að hafa í kvöldmat?“ Eftir miklar vangaveltur endar það alltaf með sömu niðurstöðunni: „Æ, ég skrepp bara út í Melabúðina og kaupi mér tilbúinn kjúkling.“ Mig langar alltaf til að breyta til en mér dettur aldrei í hug neitt nýtt svo það endar alltaf með því að ég fer út í Melabúðina og kaupi mér tilbúinn kjúkling. Þannig festist ég í þessari venju. Ég verð að viðurkenna að ég er orðinn nokkuð leiður á honum. En það verður hins vegar seint sagt að ég sé ósjálfbjarga. Skyldi það vera tilbúinn kjúklingur næsta kvöld þegar ég er einn heima?

Bless

Sorgardagur í dag, lónið er byrjað að fyllast.
Bless, Töfrafoss og allar þið náttúruperlur sem bíða dauða ykkar.

Sunnudagsþankar

Þetta flýgur í gegn um huga minn þessa stundina:

Ég horfði á hið margauglýsta viðtal við Davíð Oddsson í Kastljósinu. Ég kom inn þegar Davíð sagði eitthvað á þessa leið: "Ég svaraði mönnum bara þegar mér hentaði." Já, hann viðurkennir greinilega að hafa gefið skít í andstæðinga sína með svona einræðislegum tilburðum. Annars verð ég að viðurkenna að ég er sammála honum um að Ólafur Ragnar hefði frekar átt að vísa Kárahnjúkamálinu til þjóðarinnar heldur en fjölmiðlafrumvarpinu. En Davíð er þó bara fortíð núna, eða hvað?

Hindúasiður er flókin trú.

Þessi frétt er frekar skemmtileg. Þá sérstaklega þegar talað er um Arndísi Sveinsdóttur og NSF. Jón Sigurðsson er líka fyndinn með sínar yfirlýsingar. En að öllu gamni slepptu þá er ríkisstjórnarsamstarf VG og Samfylkingarinnar góður kostur.

Staða kvennaknattspyrnunar á Íslandi er áhyggjuefni. Sérstaklega þegar lið ákveður að mæta ekki. Fjölmiðlar kunna ekki skýringu á þessu. Ætli skýringin liggi ekki bara hér

Iceland film festival stendur yfir. Ég verð að drífa mig í bíó (þeir sem þekkja mig best vita að ég dríf mig sjaldan til að gera eitthvað sniðugt). Einhver til?

Íslenskt orð yfir "að brainstorma"? Að skjóta þönkum? Einhver með betri tillögur?

Hið daglega amstur heldur áfram, alltaf nóg að gera og lítill tími til að slaka á. Ég leyfi mér nú samt að slaka á inn á milli.

Hvað ætli fljúgi í gegn um huga minn á morgun?

Litið yfir sumarið

Að ganga Laugaveginn í blíðskaparveðri, njótandi fallegrar náttúru við hvert sjónmál, verður að teljast góður endir á blautu, en þó ágætu, sumri.

Sumarið hefur verið bara ágætt hjá mér í ár. Mér finnst samt eins og ég hafi ekki gert neitt nema að vinna og nú er það allt í einu liðið. Vinnan var ágæt. Ég var að vinna í Fossvogskirkjugarði í sumar. Ósköp venjuleg garðyrkjuvinna sem snýst um að gera garðinn fínan fyrir 17. júní og svo slaka á eftir það. Ég held að ég hafi orðið latari eftir því sem á sumarið leið. Það skemmdi heldur ekki fyrir að flokkstjórinn minn var þekktur í garðinum sem "pásukóngurinn". Félagslífið var líka nokkuð gott og kirkjugarðapartýin ágæt. Líkurnar á því að ég endi þar næsta sumar verða að teljast nokkuð miklar.

Ég hef lítið gert í sumar, sem telst frásagnahæft, fyrr en um helgina en þá gekk ég laugaveginn ásamt föður mínum og systkinum mínum. Það er aldeilis ástæða fyrir því að Laugavegurinn er vinsæl gönguleið. Landslagið er einstaklega fallegt og síbreytilegt. Það er unum að ganga þessa leið og njóta fallegrar náttúru. Það vaknar meira að segja upp þjóðerniskennd í mér þegar ég sé hvað Ísland er fallegt land.

En nú er sumarið senn á enda og skólinn að byrja. Það er alltaf nokkuð spennandi að byrja aftur í skólanum og sjá hvað nýtt ár felur í skauti sér. Hver ætli verði kórstjóri MR-kórsins á næsta ári?

Íslenska á alþjóðavettvangi.

Í kvöldfréttunum í Ríkissjónvarpinu áðan sá ég blaðamannafund með Ólafi Ragnari Grímssyni og Karolos Papoulias, forseta Grikklands. Það vakti athygli mína að hann talaði þar á ensku, þrátt fyrir að vera staddur á heima á Fróni og að Papoulias talar ekki ensku sem móðurmál. Nú er þetta að sjálfsögðu ekki einsdæmi því íslenskir embættismenn tala alltaf ensku á erlendum blaðamannafundum, jafnvel þótt hinn viðmælandinn tali sjálfur ekki ensku sem og minnihluti þjóðar hans. Þá spyr ég sjálfan mig: "Af hverju geta embættismenn aldrei notað íslenskuna á alþjóðavettvangi." Þá segja kannski aðrir: Af því að aðeins 300.000 manns skilja hana en allir skilja enskuna." Þrátt fyrir að miklu fleiri skilji ensku þá er alltaf hægt að fá túlk til að þýða íslenskuna yfir á ensku. Íslenskan er fallegt tungumál sem flestir Íslendingar eru stoltir af. Af hverju ekki að hampa henni meira á erlendri grundu og sýna að við erum stoltir af henni? Það er líka gaman fyrir fólk í öðrum löndum að hlusta á fleiri tungumál þótt það skilji ekki endilega tungumálið. Mér finnst. t.d. gaman að sjá viðtal við Jaques Chirac talandi frönsku með sínu handapati þótt ég skilji hann ekki mikið.
Það myndi ylja mér um hjartarætur að heyra íslenskuna talaða á alþjóðavettvangi.

Vinsæll ráðherra.

Gaman að sjá hvað Anders Fogh Rasmussen er alltaf jafn vinsæll í Danmörku.

Listi yfir týnda hluti

Ég hef sett inn lista yfir hluti sem ég hef týnt, inn á bloggið mitt. Ég fékk þá hugdettu þegar ég var að leita að ökunámsbókinni minni og var að setja hana á listann þegar ég fann hana. Nú eru á listanum hlutir sem eru búnir að vera týndir lengi og býst ég ekki við að sjá þá aftur. Þessi listi er til gamans gerður og einnig fyrir mig sjálfan til að minna mig á hvað ég get verið mikill skussi.

Án titils

Gott framtak hjá Skjá 1: Að sýna Woody Allen myndir á sunnudagskvöldum.

Slæmt framtak hjá Skjá 1: Að sýna jafn ómerkilega spennuþætti á borð við "Wanted" á undan Woody Allen myndunum.

Halldór út en framsókn áfram á niðurleið.

Stórtíðindi virðast vera framundan í íslenskum stjórnmálum. Halldór Ásgrímsson virðist ætla að taka á sig skellinn og segja af sér sem formaður framsóknarflokksins og jafnvel sem forsætisráðherra. Ég græt nú ekki brotthvarf hans úr stjórnmálum. Mér finnst að hann hefði átt að segja af sér sem utanríkisráðherra eftir að hafa, ásamt Davíð Oddssyni sem þá hefði líka átt að segja af sér, lýst yfir stuðningi við árásarstríð án þessa að hafa Alþingi eða þjóðina með í ráðum. En hins vegar myndi ég ekki gera hann ábyrgan fyrir slöku gengi Framsóknarflokksins í sveitastjórnakosningunum. Fólkið veit að Framsóknarflokkurinn er stefnulaus flokkur sem hagar seglum eftir vindi og engin þörf fyrir þá í íslenskum stjórnmálum. Hrókeringar innan flokksins og stólaskipti í hinni útbrunnu rískisstjórn eru algerlega gagnlaus og munu ekki bjarga honum. Mikið hlakka ég til næstu Alþingiskosninga. Þá verður loksins komin vinstristjórn.

Sveitastjórnakosningar:

Þar sem hinir síðustu munu verða fyrstir!

Eurovisiontilfinning

Okkar lag var best, hin lögin voru ömurleg, fokking* Austur-Evrópulöndin sem kjósa hvert annað.

Gamla góða "Eurovision tilfinningin" sem við upplifum hvert ár er hið íslenska lag nær ekki nógu góðum árangri.

*Blótsyrði í tilefni þess að allt varð vitlaust er Sylvía Nótt notaði það í myndbandi sínu.

Án titils

Að lesa tveimur eða fleiri dögum fyrir próf, er hæfileiki sem mig skortir.

28. apríl

Þann 28. apríl árið 1945 var Benito Mussolini tekinn af lífi af skæruliðum.

44 árum síðar fæddist ég.

GB: Spurt að leikslokum

Í tilefni þess að Gettu betur er lokið í ár vil ég tjá þanka mína um þá keppni núna.

Ég vil byrja á því að óska strákunum í MA til hamingju með sigurinn. Þeir eiga sigurinn innilega skilið. Eftir að þeir slógu okkur út var ég alveg viss um að þeir stæðu uppi sem sigurvegarar í ár.
Fyrir úrslitaleikinn spáði ég því að Versló myndi leiða eftir hraðaspurningarnar en svo myndi MA síga fram úr og vinna keppnina. Það rættist nema að MA náðu öruggri forystu eftir hraðann og juku smátt og smátt við hana og sigruðu örugglega. Verslingar stóðu sig ágætlega en þei áttu einfaldlega ekki möguleika í gríðarsterka lið MA.

Eftir að við duttum út úr GB hélt ég að sjálfsögðu áfram að fylgjast með henni. Eftir að hafa séð hraðann hjá öðrum liðum hugsaði ég ávallt með mér: "Við hefðum rústað þeim í hraðanum og svo unnið keppnina." Síðan rann það jafn óðum upp fyrir mér að við rústuðum MA í hraðanum en töpuðum samt. Einnig hugsaði ég líka oft á þennan veg er ég sá MA: "Bara ef þríþrautin hefði verð aðeins öðruvísi eða Tryggvi í MA hefði ekki gert heimasíðu um Bern [sem Atli Freyr kallaði "Raufarhöfn Evrópu"]." En það þýðir ekki að vera að svekkja sig yfir svona hlutum.
Ég er alla vegana feginn að Gettu betur sé lokið í ár og þá get ég hætt að svekkja mig. MA verðskuldar titilinn fyllilega en á næsta ári ætlum við að vinna þessa keppni. Við eigum nú skilið smá heppni.

Án titils

Mikið getur Minesweeper verið ávanabindandi leikur.

Hneyksli hjá KR

Ég hef aldrei skammast mín jafn mikið og núna fyrir að hafa æft fótbolta með KR. Ástæðan er þessi. Það er alveg til háborinnar skammar að vera að niðurlægja konur á þann hátt sem gert var á Herrakvöldinu sem haldið var um daginn.
Ef einhver spyr, þá er ég núna Gróttumaður enda hef ég æft handbolta þar.

Enn ein getraunin

Ég veit að þetta er orðið þreytt. En mér leiðist en og aftur.

Hvaða menn eru þetta og fyrir hvað eru þeir frægir?
Magnús Þorlákur má ekki svara.

Fánagetraun

Í tilefni þess að mér leiðist hef ég ákveðið að setja inn aðra getraun



Hvaða fáni er þetta?

Getraun

Myndirnar tvær sýna leikara í hlutverki persónu úr Biblíunni.
Spurningin er tvíþætt. Hvað heitir leikarinn og hvaða persónu úr Biblíunni er hann að leika á þessum myndum?

Gettu betur

Þá er ljóst að við munum ekki hampa hljóðnemanum í ár eftir tap gegn MA 26-24. Við byrjuðum vel og náðum 5 stiga forystu í hraðanum en það dugði ekki. MA náði að jafna eftir fyrri vísbendingaspurningar og leiddi svo með tveimur stigum fyrir þríþrautina. Við vissum svarið við henni en svöruðum ekki því sem dómarinn vildi fá.

Ég verð að viðurkenna að það var nokkuð svekkjandi að tapa þessari viðuregn. Við vorum ekkert síðra lið en MA en heppnin var með þeim í kvöld. En MA-ingar voru bara góðir og það verður ekki tekið af þeim. Lið þeirra hefur ágæta reynslu enda voru tveir þeirra í úrslitunum í fyrra. Ég held að þetta lið vinni í ár.

Ég segi bara takk fyrir mig og óska MA-ingum góðs gengis í Gettu betur. Við mætum með óbreytt lið á næsta ári og þá munum við vinna.

Friðarsúlan

Yoko Ono ætar að setja upp friðarsúlu í Reykjavík, nánar tiltekið Viðey. Ég verð að segja að mér finnst þetta skemmtileg hugmynd. Friðarsúlan felur í sér góðan boðskap og mun setja skemmtilegan svip á borgina. Ég tel það vera heiður fyrir Reykjavík og Ísland að Yoko vilji hafa friðarsúluna í Viðey. En af einni ástæðu finnst mér ekki rétt að hafa hana á landinu. Mér finnst það ekki fara saman að hafa þessa friðarsúlu í landi með ríkisstjórn sem styður allan stríðsrekstur Bandaríkjanna í algerri blindni.
Ég vil þó að friðarsúlan rísi hér í Reykjavík. Hún samræmist draumum mínum um að Ísland verði boðberi friðar á alþjóðavettvangi.
Friðarsúlan mun passa vel inn í landið árið 2007 þegar Íslendingar verða búnir að kjósa sér vinstristjórn sem styður ekki stríð.

Lögmál Björns Reynis

Vegna mikillar sjálfsdýrkunnar verð ég að nefna eitt lögmál eftir mér.
Lögmál Björns Reynis hljómar svona:

Sama hvar þú ert, þú gleymir alltaf einhverju.

Gettu betur

Í kvöld sigruðum við ME 26-17. Við fórum reyndar illa af stað í hraðanum (að fara illa af stað í hraða er ansi taugatrekkjandi) en við náðum þó 20 stigum. Sigurinn var aldrei í hættu eftir hraðann.
Við erum því komnir í sjónvarpið og á morgun verður dregið í 8-liða úrslit. Það verður spennandi að sjá hverjir mótherjar okkar verða. Persónulega langar mig mest til að keppa á móti Versló af tveimur ástæðum. 1) Hafsteinn, vinur minn og gamall félagi úr Nema hvað? er í liðinu. 2) Gamli góði MR-ví rígurinn.
Annars skiptir það litlu máli hverja við fáum í 8-liða úrslitum.
Í lokin verð ég að viðurkenna að það er ansi skrýtið að keppa við lið sem er ekki á staðnum.

Týnt veski

Ég veit að ég segi þetta oft en veskið mitt er týnt. Í þetta skiptið er það ekki í skólatöskunni minni. Ég er farinn að hafa verulegar áhyggjur.

Ágætis byrjun

Þá er fyrsta keppnin búin. Þetta var bara nokkuð öruggt hjá okkur, 26-5. Ég er bara sáttur.

Einn liðsmaður FB var ekki svo ólíkur Frank.

Nú er nóg komið!

DV er ljótur blettur á samfélaginu. Eftir að sjálfsmorð er framið, í kjölfar frétt þess, standa ritstjórar blaðsins fast við sína stefnu og sýna engin merki um iðrun og ábyrgð. Ég er farinn að efast um að þeir séu mannlegir. Ritstefna DV verður seint talin mannúðleg. Sjálfsmorðið er afleiðing hennar og ætti önnum að vera ljóst hversu hættuleg hún getur verið.

Ef þið eruð ekki nú þegar búin að skrifa undir hvet ég ykkur til að gera það strax.

Án titils

Það var bara nokkuð gaman að mæta aftur í skólann í dag. Cösukjallarinn hefur verið opnaður en hann hafði verið lokaður frá því ég byrjaði í MR. Skólaþorpið hefur tekið á sig nýja mynd og stemmingin er öðruvísi í skólanum. Ég verð þó að viðurkenna að ég hálfsakna kakólandsgámsins. Ég held að ég sé einn um það.

Nýjustu tíðindin eru svo þau að við mætum Fjölbrautarskólanum í Breiðholti í fyrstu umferð í Gettu betur. Viðuregnin fer fram þann 16. janúar kl. 20:00 í útvarpshúsinu. Mér líst bara nokkuð vel á þessa viðuregn.

Þorláksmessuhugleiðingar

Jólin í ár hafa á einhvern hátt farið algerlega fram hjá mér. Mér finnst alltaf skrýtið þegar Þorláksmessa rennur upp og einn dagur er til jóla. Í ár er það enn skrýtnara. Mér finnst jólin alltaf vera langt framundan þó þau hefjist á morgun.
Ég hef ekki farið mikið í bæinn fyrir jólin nema í dag. Þá fór ég að syngja með MR-kórnumn á nokkrum stöðum niður í bæ. Það er alltaf stemming í bænum á Þorláksmessu og þess vegna gaman að syngja þar jólalög. Einnig fór ég í friðargöngu en fyrir mér er það ómissandi þáttur á Þorláksmessu. Svo erum við nýbúin að skreyta jólatréið.
Ég er því núna farinn að gera mér grein fyrir því að það er ansi stutt í jólin.

Jóladagatalið

Það hefur verið hefð í fjölskyldunni síðan ég man eftir mér, að setja upp jóladagatal (sjá mynd til vinstri) þar sem 24 pokar, einn fyrir hvern dag fram að jólum, eru látnir hanga og mamma eða pabbi laumar einhverju sætu í pokanna handa okkur systkinunum. Í gamla daga stilltum við Nanna og Bjarki okkur upp fyrir framan dagatalið og tókum spennt upp úr pokunum. Það hefur lítið farið fyrir þessari hefð undanfarin ár enda erum við orðin eldri og Bjarki fluttur að heiman. Dagatalið hefur þó alltaf verið til staðar og höfum við Nanna tekið upp úr pokunum þegar okkur hentar þó að hinn aðilinn sé ekki viðstaddur.



Mamma vill ólm halda í hefðina og sagði við mig um daginn að nú væri kominn tími á að setja upp jóladagatalið. Ég benti henni á að þessi hefð væri deyjandi. Hún ákvað því að við skyldum öll taka upp úr pokunum saman eins og í gamla
daga. Hún hefur m.a.s. bryddað upp á þeirri nýjung að láta spurningar fylgja með. Þá fáum við Nanna hvor okkar spurningu. Spurningin sem Nanna fékk var svona:

"Jónas Hallgrímsson, Tómas Sæmundsson og Konráð Pétursson. Hvern vantar í þennan hóp?"

Eins og glöggir menn taka eftir þá passar Konráð Pétursson ekki inn í þennan hóp. Þarna hefði auðvitað átt að standa Konráð Gíslason (eða Brynjólfur Pétursson). Þannig að Nanna gat auvitað ekki svarað þessu. Ég benti mömmu á þessa vitleysu. Þá játaði hún að hafa ekki samið þessar spurningar. Þetta var víst spurning úr forprófi fyrir Meistarann, nýja spurnangaþáttinn hans Loga Bergmanns Eiðssonar. Forprófið hafði verið skilið eftir í Hagaskóla, þar sem mammaa vinnur, en þar var forprófið haldið. Þaðan má rekja þessa villu. Annars held ég að Nanna sé ekkert allt of hrifin af þessari nýjung.

Þessi hefð lifir þó enn og Bjarki kemur heim 17. des. og mun taka upp úr pokunum með okkur þá. Það eru líka fleiri hefðir í kringum jólin eins og laufabrauðagerð, sem enn lifa. Hefðirnar lifa enn.

Óreiða

Ég held að óreiða sé náttúrulegt ástand herbergisins míns.

Nýr spyrill

Það víst búið að ráða Sigmar Guðmundsson sem spyril í Gettu betur. Mér líst bara ágætlega á hann. Ég hefði nú samt alveg viljað sjá konu sem spyril og karlkyns stigavörð, svona til tilbreytingar.

Óður til hinna týndu hluta.

Það er alltaf einhver hlutur týndur. Núna er það veskið. Auk þess gleymdi ég húfu í Verslunarskólanum á MR-ví deginum (reyndar er það svolítið langt síðan).

Ég er viss um að þetta var hér allt í gær!

Án titils

Stundum getur verið of auðvelt að plata mig í einhverja vitleysu.

Án titils

Það er alveg ótrúlegt hvað sum lög, notuð til tungumálakennslu, geta síast inn í heilann til skamms tíma, hvort sem þau eru góð eða léleg.

Án titils

Hversu oft skyldi ég hafa heyrt þessa spurningu hljóma (aðallega frá stúlkum): "Hva, manstu ekki mér?"

Húrra, húrra, húrra!

Davíð er að hætta!

Forprófið 2

Í dag voru niðurstöður forprófsins birtar í Gamla skóla. Ég varð alveg steinhissa þegar ég sá nafn mitt efst á listanum með 168 stig, eða 8 stigum á undan næsta manni. Ég hélt í fyrstu að þetta væri eitthvert busagrín og er enn að velta því fyrir mér. Ég átti sko alls ekki von á þessu og eins og þið, lesendur vitið þá var ég mjög svartsýnn í gær. Nú er spurning hvort að þetta þýði endanlega að ég hætti í handboltanum en ég hef verið að gefa það í skyn að undanförnu. En ég ætla ekki að vera að ákveða það núna.

Forprófið

Í dag gerði ég heiðarlega tilraun til að komast í lið MR í Gettu-betur. Stefnan var sett á liðsstjórasætið. Mér gekk sæmilega á prófinu en ég er þó ekkert viss um það hvort ég nái takmarki mínu en lifi í vonini. Ég klikkaði á sumum hlutum sem ég átti hreinlega að vita. Ég verð bara að gera betur næst.

MR-kórinn

Ég reyndi fyrir mér í söng í dag þar sem prufur í MR-kórinn fóru fram. Þegar ég kom inn hafði ég ekki hugmynd um hvað ég væri að gera þarna syngjandi "mo-mo-mo". Ég náði tónunum ekkert allt of vel og datt m.a.s út um tíma. Þá sagði hann bara að ég væri góður bassi og ég á að mæta á mánudaginn.
Mun ég standa undir væntingum?

Bandaríkin og SÞ

Eiga Bandaríkin heima í SÞ? Maður spyr sig.

Fyrsta vikan

Þá er fyrsta vikan í MR liðin. Hún hefur liðið bara mjög hratt enda gaman í MR. Það er ágætt að vera alltaf í sömu litlu stofunni. Ég er aðeins farinn að kynnast bekkjarsystkinum mínum og við Sindri erum þegar byrjaðir í kosningaslag um embætti bekkjarráðsmanns 3-A.
Félagsaðstaðan er lokuð. Ekki alveg draumabyrjun þar en það lagast. Einnig finnst mér ágæt úti stemmingin sem myndast gjarnan á portinu á milli Íþöku og íþróttahúsins.
Busakynningin var ágæt. Ég slapp reyndar við að vera tekinn upp á svið. Ég þurfti ekki einu sinni að segja "heyjó". Svo er það bara busadagur framundan. Það verður bara nokkuð gaman.
Svo er ég að í huga að ganga í MR-kórinn eftir að hafa heillast af flutningi hans á Bohemian Rapsody á skólasetninguni. En það stangast á við handboltann. Hvað á ég að gera?
Það eru góðir tímar framundan.

Og fyrir þá sem kvarta yfir spillinum um Harry Potter, ég varaði ykkur við.

X-V í staðinn fyrir R

Það hefur ekki farið framhjá mörgum að R-listinn úr sögunni. Eins og menn vita vorum það við Vinstri-græn sem tókum af skarið og ákváðum að fara í sérframboð. Sumir vilja kenna okkur um að hafa kálað R-listanum og aðrir segja að við hafi málað okkur út í horn. R-listinn er orðið dautt stjórnmálaafl og flokkarnir hættir að ná saman. Einhver að taka af skarið og slíta þessu endanlega. Ég hef alveg trú á því að VG verði áfram við stjórn sama hvað aðrir segja. Það er hægt að byrja kosningabaráttuna með því að losa okkur við allar mýturnar.

Bókagagnrýni

Eftir gott sumarfrí frá blogginu hef ég ákveðið að snúa aftur með smá bókagagnrýni. Bókin er Harry Potter and the half-blood prince.

Í þessari sjöttu bók um Harry Potter fær hann námsbók í töfradrykkjum sem hinn dularfulli blendingsprins átti, Prinsinn hefur skrifað uppskriftir og galdra í bókina, Harry til mikillar lukku - og vandræða. Á sama tíma grunar hann Draco Malfoy um eitthvað ráðabrugg og skyggnist inn í fortíð Voldemorts.

Varúð:spillir hérna
Mér finnst bókin vera nokkuð svipuð og næsta á undan henni. Í upphafi er býst maður við mikilli spennu en svo tekur við frásögn um daglegt líf Harrys og ekkert spennandi gerist fyrr en í síðustu köflunum. En síðustu kaflarnir voru þó spennandi. Nú kemur spillir. Snape drepur Dumbledore. Það hefur gríðarlega mikið að segja fyrir bækurnar enda Dumbledore ein mikilvægasta persóna bókanna og nú veit maður loksins hvort Snape er góður eða vondur. En í heildina séð ekkert sérstök. Bókin er þó aðeins styttri sem er ágætt enda enginn þörf að skrifa svo lngar bækur ef það gerist ekki mikið í þeim.
Nú ætlast ég hreinlega til þess að Rowling bæti upp fyrir síðustu tvær bækur og klári þessa bókaröð almennilega.

Sumarið er gúrkutíð... eða nær oftast

Það gerist á sumrin að skrif á þessa síðu minnka stórlega. Af hverju? Jú, það gerist bara svo lítið frásagnahæft þá og ekki er mikið í fréttunum.
Því miður hafa hryðjuverkamenn séð fjölmiðlum fyrir nóg af efni með andstyggilegri árás á saklaust fólk sem aldrei gerði þeim mein. Bush og félagar sögðu líka að heimurinn væri öruggari eftir Íraksstríðið. Hver trúði því svo sem.

Það kom mér ekki á óvart þegar ég heyrði í fréttum að landamæragæsla væri hert. Ástæðan kom mér hins vegar á óvart. Að það skuli vera gert af ótta við mótmælendur sem vilja mótmæla mestu skemmdarverkum Íslandssögunnar. Ég stoppaði aðeins við mótmælabúðirnar um daginn. Það var heldur lítið að gerast enda var stór hópur af fólki nýfarinn. Ég vildi gista þarna en Pabbi og vinur hans sem ég ferðaðist með vildu það ekki. Ég skil heldur ekki þær áhyggjur lögreglunnar af því að á SavingIceland.org er fólk hvatt til að koma og mótmæla. Það er bara hluti af baráttu að fá fólk til að koma og sýna samstöðu með málefninu. Það skaðar heldur ekki að fá fleiri mótmælendur, jafnvel þó þeir séu anarkistar (þeir gera nú ekki mikið af sér í auðninni). Annars tel ég anarkista ekki líklegasta hópinn til að koma og mótmæla.
En löggan er þó ekki enn búinn að handtaka neinn og vísa burt vegna mótmæla. Það er gott

Annars var hálendisferðin bara ágæt. Við gengum m.a. á Snæfell, hæsta fjallið utan Vatnajökuls og ég fékk að keyra nokkuð mikið enda kominn með æfingaleyfi. Svo mun ég vera á Flúðum næstu vikuna og mun ég vinna eitthvað í garðyrkju þar áður en ég sný aftur til vinnu í Neskirkju.

Kominn heim.

Þá er maður kominn aftur heim til Íslands. Ég var farinn að sakna landsins. Granollers er ekki skemmtilegur bær. Þegar maður var ekki að spila handbolta var mjög lítið að gerast. Við kepptum 5 leiki á mótinu. Við byrjuðum á því að gera dramatískt jafntefli á móti Visoko frá Bosníu þegar Ægir skoraði frá miðju á síðustu sek. Svo töpuðum á móti spænsku liði, unnum tvö spænsk og töpuðum síðan á móti Herulf frá Noregi og komust ekki upp úr riðilinum. Þegar mótið var búið fórum við í skemmtigarð og svo til bæjarins Calella þar sem við dvöldum síðustu daga. Einnig var farið til Barcelona einn daginn en það olli mér hins vegar vonbrigðum að geta ekki skoðað Sagrada Familia-kirkjuna. Það þýðir að ég þarf að koma aftur til Barcelona einhvern tíman seinna.

Í heildina litið er finnst mér ekki gaman að fara í keppnisferð til Spánar. Spánn er áhugavert land en maður er of bundinn af hópnum. Svo er líka allt of heitt þar. Frekar vil ég fara til Danmerkur eða Svíþjóðar. Ef ég er spurður hvort ég vilji fara aftur í keppnisferð til útlanda þá myndi ég segja nei. Frekar vil ég fara til útlanda á eigin vegum.
Hér er svo ferðasaga frá Arnari þjálfara

Ég er reyndar nokkuð svekktur yfir því að hafa misst af brúðkaupi Nönnu, frænku minnar sem var haldið í Viðey. Sérstaklega þegar ég las umfjöllun frá Frank. En stundum verð ég að fórna einhverju.