GB: Hljóðneminn heim

Þá hefur tveggja vetra starf loksins skilað sér, við erum búnir að vinna Gettu betur. Keppni gærkvöldsins var mjög spennandi og skemmtileg. MK-ingar sýndu að þeir væru hörkulið, sýnd veiði en ekki gefin.

Keppnin minnti mig svolítið á viðuregn okkar gegn MA í fyrra. Náðum góðri forystu í hraðanum en misstum hana svo eftir tvær vísbendingaspurningar. Við tók strembinn bjöllubardagi þar sem ekkert gekk upp eftir að við vorum komnir með 23 stig og tap virtist blasa við þegar ein vísbendingaspurning og þríþraut voru eftir. En ólíkt keppninni í fyrra náðum við þríþrautinni og knúðum fram bráðabana þar sem við tókum tvær spurningar í röð og sigruðum að lokum 29-27.

Í svona jafnri keppni hefði sigurinn getað fallið báðum meginn og tapliðið hugsar um e-ð eitt sem fór úrskeiðis. Í raun er alltaf e-ð sem bæði lið hefðu getað tekið. Ég var örlítið svekktur að taka ekki Jóhannesarguðspjall í hraðanum og svo að láta MK-ingana hirða fjallagrösin af okkur. En það kom ekki að sök því heppnin var með okkur í gær. Við áttum alveg skilið smá heppni eftir að hafa verið óheppnir í fyrra.

MK-ingarnir eiga svo sannarlega hrós skilið. Ég átti aldrei von á því að þeir myndu veita okkur hörðustu keppnina í ár. Liðið bætti sig töluvert eftir því sem á keppnina leið og skutu okkur aldeilis skelk í bringu. Takk fyrir góða keppni.

Gettu betur er þá bara lokið í ár og lauk ánægjulega fyrir okkur. Ég er bara mjög glaður, get ekki sagt annað. Veturinn hefur verið skemmtilegur og gaman að sjá þetta markmið okkar verða að veruleika. Ég segi bara: Takk fyrir mig!

GB: Sigur gegn Versló

Ég er enn í hálfgerði sigurvímu núna. Það er ekki leiðinlegt að leggja Verslunarskólann að velli með tíu stiga mun, 37-27. Ekki síst vegna þess að það er nú nokkur rígur á milli. En rígurinn er að sjálfsögðu grafinn eftir keppni. Verslingarnir voru bara nokkuð góðir. En við vorum bara betri. Við erum á fljúgandi siglinglu og færumst skrefi nær hljóðnemanum. Annars segi ég bara: Takk fyrir góða keppni, Verslingar.

Án titils

Ég væri til í að sjá svona póstkassa í Reykjavík.

GB: Góður sigur í gær.

Ég get ekki annað en verið sáttur með okkur í gær. Að ná 38 stigum er bara frábært, að vísu hefði verið skemmtilegt að fara yfir 40 stiga múrinn en það skiptir svo sem engu máli. Við áttum líka mikið inni síðan í fyrra en þá náðum við ekki að sýna okkar rétta andlit. Einnig er MS-ingum þakkað fyrir góða keppni.

Ég var bara almennt sáttur við spurningarnar. Septuaginta-spurningin var að vísu umdeild en ég var hins vegar nokkuð óskýr þegar ég svaraði. Í raun vissi ég ekki hverju ég átti að svara og var næstum því farinn að segja grísk þýðing á Gamla testamentinu, sem hefði verið óþjált í hraða. Það var líka nokkuð skemmtilegt að fá aftur spurningu um Burkina faso. Minningar helltust yfir mig og ég vildi ekki láta andstæðingin hirða svarið aftur af okkur.

Undanúrslitin eru svo bara næst á dagskrá. Það er ágætt að vera kominn yfir fjórðungsúrslitin, þar sem við duttum út í fyrra. Þá verður forvitnilegt að sjá hvort við fáum MK, versló eða MH/ME. Annars er okkur bara sama. Við ætlum bara að halda áfram á þessari braut.

Netlögga

Steingrímur J talar um að koma á fót netlöggu. Ég held að allir nafnlausu netdólgarnir sanni það bara að hann hafi rétt fyrir sér.

Klám í Reykjavík?

Það hefur vart farið framhjá nokkrum að klámráðstefnu á að halda hér. Það eru líka flestir sammála um að þetta sé ekki boðlegt siðbrúðum mönnum. Samt er hægt að deila um þetta mál. Sumum finnst sjálfsagt að leyfa þessu fólki að koma hingað og halda þessa ráðstefnu. Mér finnst það hins vegar ekki. Þetta er ekki eins og hver önnur ráðstefna. Hér er fólk að koma saman til að ræða um, versla með og jafnvel framleiða efni sem er siðlaust og ómannlegt. Það er ekki mannlegt að gera mannslíkama að söluvöru þar sem annað (í langflestum tilvikum kvenkynið) er niðurlægt. Aldrei myndi nokkur leyfa þessu að viðgangast væri um fíkniefni að ræða.
Þá er það spurningin hvað er hægt gera við þetta fólk. Um það er hægt að deila. Mér finnst sjálfsagt að synja þessu fólki um að koma til landsins í þessum tilgangi í stað þess að bíða að lögbrot verði framið. Þó að fólkið eigi svo sem rétt á að heimsækja landið eins og aðrir þá verður það bara að vera á öðrum forsendum.

Sniðug hugmynd.

Að skrifa sniðugar hugmyndir á blað áður en að ég gleymi þeim.

Nafnaritgerð

Ég var búinn að gleyma því hvað ættfræðin væri skemmtileg.

Án titils

Gamla góða frestannahneigðin!

Án titils

Mikið þoli ég ekki tölvunarfræðitíma.

GB: MS næst

Það má segja að við höfum tekið Lækjargötuslaginn nokkuð sannfærindi en að Kvennaskólinn hafi jafnframt tapað með reisn. Þeim er að sjálfsögðu þakkað fyrir góða keppni. Einnig er stuðningsmönnum þakkað fyrir að fjölmenna og halda uppi rífandi stemmingu í útvarpshúsinu. 30-20 voru sem sagt úrslitin.
En næstir á dagskrá eru MS og fer keppnin fram 9. mars. Ég er strax farinn að hlakka til.

GB: 2. umferð og GB-bloggsamfélagið

Það er búið að draga í aðra umferð. Mótherji okkar að þessu sinni verður Kvennaskólinn í Reykjavík. Mér líst bara vel á að fá Kvennskælinga sem mótherja. Áhugaverðasta viðuregnin í þessari umferð er þó að mínu mati Borgó-MH. Tvö lið þar á ferð sem eiga heima í sjónvarpinu og annað þeirra dettur út.
Ég er farinn að hlakka til að hefja leik enda er keppnin sjálf komin á fullt skrið. Ég fylgdist lítið með fyrstu umferðinni þar sem við hefjum leik í annarri umferð. Ég hef ekki hlustað á keppninirnar en á þær ætla ég að hlusta bara á einu bretti á netinu. Ég hef þó fylgst með umræðum í bloggheiminum. Það er gaman að sjá þetta bloggsamfélag sem rís í kring um þessa keppni. Ég vafraði um það um daginn og sá tengla á síðuna mína á þremur vefdagbókum hjá mönnum sem ég þekki lítið og jafnvel ekki neitt. En ég lít bara á það sem tækifæri til að kynnast fleirum. Ég hef gefið hinum sömu tengil til baka eins og ég geri alltaf. Ætli ég verði þá ekki að blogga meira um GB.

Annars hvet ég alla til að mæta í útvarpshúsið næsta miðvikudagskvöld kl. 20.30.

Merki um taugaveiklun?

Ég tek alltaf svakalegan kipp þegar síminn hringir eða ber mér smáskilaboð, jafnvel þegar ég á von á þeim.

GB: Fjörinu frestað um viku!

Við sitjum hjá í fyrstu umferð.

Þorláksmessuhugleiðingar ´06

Ég hef ákveðið að hafa það að venju að rita hugleiðingar mínar á Þorláksmessu hér á bloggið mitt. Hugarfar mitt núna er eiginlega bara svipað og á Þorláksmessu í fyrra. Ég er allt í einu farin að átta mig á því að jólin eru á morgun. Þorláksmessa er einmitt sá dagur þar sem ég dett inn í jólaskapið. Sérstaklega þegar ég er staddur í miðbænum með MR-kórnum syngjandi jólalög. Ég verð að segja að þetta er mjög góð hefð og gott fyrir fólk, sem er á fullu við jólainnkaup, að slaka aðeins á, staldra við og hlusta á ljúfan kórsöng.
Einnig er gaman að kíkja á mannlífið á Þorláksmessu. Nóg er af fólkinu á Laugarveginum. Ég held líka að það væri ágætis hugmynd að banna umferð bifreiða á Laugarveginum og gera hana að göngugötu á Þorláksmessu. Í raun furða ég mig á því að fólk nenni að keyra þar.

Ég ætla ekki að hafa hugleiðingar mínar lengri að þessu sinni og óska ég ykkur öllum gleðilegra jóla.

Jólatónleikar

Jólatónleikar MR-kórsins voru haldnir áðan og heppnuðust bara býsna vel. Tónleikarnir hlutu einróma lof áhorfenda sem ómuðu af gleði. Við uppskárum eins og við sáðum og eftir miklar æfingar og mikla taugaþreytu á síðustu metrunum tókst okkur að skila efninu bara vel frá okkur. Þar bar hæst "A Ceremony of Carols" eftir Benjamin Britten við fagran undirleik Sólveigar á hörpu.
Fyrir þá sem misstu af veislunni, þá verðum við í miðbænun á Þorláksmessu ef veður leyfir.

Að lokum vil ég hvetja MR-inga til að ganga í kórinn eftir áramót.

Án titils

Ég þakka heiðurinn

Að læra (ekki) fyrir próf.

Það gleðjast ekki margir yfir jólaprófum. Ég geri það nú ekki beinlínis en tek þeim þó með ró. Ef til vill aðeins of mikilli. Það má segja að ég sé kominn í nokkurs konar vítahring letis og þreytu. Ég hef aldrei verið svona latur í jólaprófum fyrr. Augnlokin þyngjast er ég opna námsbækurnar. Ég er vís til að fá mér blund, kíkja á netið (hvað er ég að gera núna), fá mér eitthvað nasl o.s.frv. Svo er ég alltaf syfjaður. Kaffið er á þrotum á það sinn þátt í því. Ég er einn heima og nenni ekki út í búð að kaupa mér meira kaffi. Ég er farinn að finna fyrir fráhvarfseinkennum. Ég er farinn að halda að kaffileysið sé uppspretta vítahringsins.

Nú halda eflaust einhverjir að ég sé á hálum ís. Svo er ekki, mér hefur hingað til gengið ágætlega enda hef ég tilhneigingu til að bjarga mér á prófum.


Hver væri ekki til í einn svona kaffibolla?

Án titils

Af hverju eru alþingismenn að eyða tíma í þetta

Majónesjól

Er hægt að finna verri titil á jólaplötu?

Án titils

Hversu oft ætli fjölskyldumeðlimir hafi líkt mér við Grím Thomsen?

Árstíðirnar fimm

Nú er komið að mínum árlega jólanöldurspistli. Nóvember er rétt byrjaður og jólaauglýsingarnar eru farnar að láta sjá sig í blöðunum. Í matvöruverslunum er nú boðið upp á jólasmákökur og malt-appelsín blönduna. Ikea og slíkar verslanir eru líka farnar að vera ansi jólaskrautlegar á þessum tíma. Reyndar minnir mig að ástandið hafi verið verra í fyrra. Það breyir því hins vegar engu að ég sé mér þörf til að nöldra. Það á ekki að byrja að auglýsa fyrir jólin í október. Það á að byrja á fyrsta sunnudag í aðventu. Þegar jólaauglýsingar byrja svon snemma dregur það úr hátíðleika jólanna þegar þau loksins koma. Þau verða orðin ansi hversdagsleg. Ég er farinn að spyrja mig hvort jólin séu hátíð eða árstíð sem hefjast seinni partinn í október,ná hámarki á jóladag og lýkir snemma í janúar? Það liggur við að hægt sé að tala um árstíðirnar fimm: Vetur, vor, sumar, haust, jól.

Tilbúinn kjúklingur

Ég er búinn að vera einn heima þó nokkrum sinnum síðustu daga. Þá er það alltaf sama spurningin: „Hvað á ég að hafa í kvöldmat?“ Eftir miklar vangaveltur endar það alltaf með sömu niðurstöðunni: „Æ, ég skrepp bara út í Melabúðina og kaupi mér tilbúinn kjúkling.“ Mig langar alltaf til að breyta til en mér dettur aldrei í hug neitt nýtt svo það endar alltaf með því að ég fer út í Melabúðina og kaupi mér tilbúinn kjúkling. Þannig festist ég í þessari venju. Ég verð að viðurkenna að ég er orðinn nokkuð leiður á honum. En það verður hins vegar seint sagt að ég sé ósjálfbjarga. Skyldi það vera tilbúinn kjúklingur næsta kvöld þegar ég er einn heima?

Bless

Sorgardagur í dag, lónið er byrjað að fyllast.
Bless, Töfrafoss og allar þið náttúruperlur sem bíða dauða ykkar.

Sunnudagsþankar

Þetta flýgur í gegn um huga minn þessa stundina:

Ég horfði á hið margauglýsta viðtal við Davíð Oddsson í Kastljósinu. Ég kom inn þegar Davíð sagði eitthvað á þessa leið: "Ég svaraði mönnum bara þegar mér hentaði." Já, hann viðurkennir greinilega að hafa gefið skít í andstæðinga sína með svona einræðislegum tilburðum. Annars verð ég að viðurkenna að ég er sammála honum um að Ólafur Ragnar hefði frekar átt að vísa Kárahnjúkamálinu til þjóðarinnar heldur en fjölmiðlafrumvarpinu. En Davíð er þó bara fortíð núna, eða hvað?

Hindúasiður er flókin trú.

Þessi frétt er frekar skemmtileg. Þá sérstaklega þegar talað er um Arndísi Sveinsdóttur og NSF. Jón Sigurðsson er líka fyndinn með sínar yfirlýsingar. En að öllu gamni slepptu þá er ríkisstjórnarsamstarf VG og Samfylkingarinnar góður kostur.

Staða kvennaknattspyrnunar á Íslandi er áhyggjuefni. Sérstaklega þegar lið ákveður að mæta ekki. Fjölmiðlar kunna ekki skýringu á þessu. Ætli skýringin liggi ekki bara hér

Iceland film festival stendur yfir. Ég verð að drífa mig í bíó (þeir sem þekkja mig best vita að ég dríf mig sjaldan til að gera eitthvað sniðugt). Einhver til?

Íslenskt orð yfir "að brainstorma"? Að skjóta þönkum? Einhver með betri tillögur?

Hið daglega amstur heldur áfram, alltaf nóg að gera og lítill tími til að slaka á. Ég leyfi mér nú samt að slaka á inn á milli.

Hvað ætli fljúgi í gegn um huga minn á morgun?

Litið yfir sumarið

Að ganga Laugaveginn í blíðskaparveðri, njótandi fallegrar náttúru við hvert sjónmál, verður að teljast góður endir á blautu, en þó ágætu, sumri.

Sumarið hefur verið bara ágætt hjá mér í ár. Mér finnst samt eins og ég hafi ekki gert neitt nema að vinna og nú er það allt í einu liðið. Vinnan var ágæt. Ég var að vinna í Fossvogskirkjugarði í sumar. Ósköp venjuleg garðyrkjuvinna sem snýst um að gera garðinn fínan fyrir 17. júní og svo slaka á eftir það. Ég held að ég hafi orðið latari eftir því sem á sumarið leið. Það skemmdi heldur ekki fyrir að flokkstjórinn minn var þekktur í garðinum sem "pásukóngurinn". Félagslífið var líka nokkuð gott og kirkjugarðapartýin ágæt. Líkurnar á því að ég endi þar næsta sumar verða að teljast nokkuð miklar.

Ég hef lítið gert í sumar, sem telst frásagnahæft, fyrr en um helgina en þá gekk ég laugaveginn ásamt föður mínum og systkinum mínum. Það er aldeilis ástæða fyrir því að Laugavegurinn er vinsæl gönguleið. Landslagið er einstaklega fallegt og síbreytilegt. Það er unum að ganga þessa leið og njóta fallegrar náttúru. Það vaknar meira að segja upp þjóðerniskennd í mér þegar ég sé hvað Ísland er fallegt land.

En nú er sumarið senn á enda og skólinn að byrja. Það er alltaf nokkuð spennandi að byrja aftur í skólanum og sjá hvað nýtt ár felur í skauti sér. Hver ætli verði kórstjóri MR-kórsins á næsta ári?

Íslenska á alþjóðavettvangi.

Í kvöldfréttunum í Ríkissjónvarpinu áðan sá ég blaðamannafund með Ólafi Ragnari Grímssyni og Karolos Papoulias, forseta Grikklands. Það vakti athygli mína að hann talaði þar á ensku, þrátt fyrir að vera staddur á heima á Fróni og að Papoulias talar ekki ensku sem móðurmál. Nú er þetta að sjálfsögðu ekki einsdæmi því íslenskir embættismenn tala alltaf ensku á erlendum blaðamannafundum, jafnvel þótt hinn viðmælandinn tali sjálfur ekki ensku sem og minnihluti þjóðar hans. Þá spyr ég sjálfan mig: "Af hverju geta embættismenn aldrei notað íslenskuna á alþjóðavettvangi." Þá segja kannski aðrir: Af því að aðeins 300.000 manns skilja hana en allir skilja enskuna." Þrátt fyrir að miklu fleiri skilji ensku þá er alltaf hægt að fá túlk til að þýða íslenskuna yfir á ensku. Íslenskan er fallegt tungumál sem flestir Íslendingar eru stoltir af. Af hverju ekki að hampa henni meira á erlendri grundu og sýna að við erum stoltir af henni? Það er líka gaman fyrir fólk í öðrum löndum að hlusta á fleiri tungumál þótt það skilji ekki endilega tungumálið. Mér finnst. t.d. gaman að sjá viðtal við Jaques Chirac talandi frönsku með sínu handapati þótt ég skilji hann ekki mikið.
Það myndi ylja mér um hjartarætur að heyra íslenskuna talaða á alþjóðavettvangi.

Vinsæll ráðherra.

Gaman að sjá hvað Anders Fogh Rasmussen er alltaf jafn vinsæll í Danmörku.

Listi yfir týnda hluti

Ég hef sett inn lista yfir hluti sem ég hef týnt, inn á bloggið mitt. Ég fékk þá hugdettu þegar ég var að leita að ökunámsbókinni minni og var að setja hana á listann þegar ég fann hana. Nú eru á listanum hlutir sem eru búnir að vera týndir lengi og býst ég ekki við að sjá þá aftur. Þessi listi er til gamans gerður og einnig fyrir mig sjálfan til að minna mig á hvað ég get verið mikill skussi.

Án titils

Gott framtak hjá Skjá 1: Að sýna Woody Allen myndir á sunnudagskvöldum.

Slæmt framtak hjá Skjá 1: Að sýna jafn ómerkilega spennuþætti á borð við "Wanted" á undan Woody Allen myndunum.

Halldór út en framsókn áfram á niðurleið.

Stórtíðindi virðast vera framundan í íslenskum stjórnmálum. Halldór Ásgrímsson virðist ætla að taka á sig skellinn og segja af sér sem formaður framsóknarflokksins og jafnvel sem forsætisráðherra. Ég græt nú ekki brotthvarf hans úr stjórnmálum. Mér finnst að hann hefði átt að segja af sér sem utanríkisráðherra eftir að hafa, ásamt Davíð Oddssyni sem þá hefði líka átt að segja af sér, lýst yfir stuðningi við árásarstríð án þessa að hafa Alþingi eða þjóðina með í ráðum. En hins vegar myndi ég ekki gera hann ábyrgan fyrir slöku gengi Framsóknarflokksins í sveitastjórnakosningunum. Fólkið veit að Framsóknarflokkurinn er stefnulaus flokkur sem hagar seglum eftir vindi og engin þörf fyrir þá í íslenskum stjórnmálum. Hrókeringar innan flokksins og stólaskipti í hinni útbrunnu rískisstjórn eru algerlega gagnlaus og munu ekki bjarga honum. Mikið hlakka ég til næstu Alþingiskosninga. Þá verður loksins komin vinstristjórn.

Sveitastjórnakosningar:

Þar sem hinir síðustu munu verða fyrstir!

Eurovisiontilfinning

Okkar lag var best, hin lögin voru ömurleg, fokking* Austur-Evrópulöndin sem kjósa hvert annað.

Gamla góða "Eurovision tilfinningin" sem við upplifum hvert ár er hið íslenska lag nær ekki nógu góðum árangri.

*Blótsyrði í tilefni þess að allt varð vitlaust er Sylvía Nótt notaði það í myndbandi sínu.

Án titils

Að lesa tveimur eða fleiri dögum fyrir próf, er hæfileiki sem mig skortir.

28. apríl

Þann 28. apríl árið 1945 var Benito Mussolini tekinn af lífi af skæruliðum.

44 árum síðar fæddist ég.

GB: Spurt að leikslokum

Í tilefni þess að Gettu betur er lokið í ár vil ég tjá þanka mína um þá keppni núna.

Ég vil byrja á því að óska strákunum í MA til hamingju með sigurinn. Þeir eiga sigurinn innilega skilið. Eftir að þeir slógu okkur út var ég alveg viss um að þeir stæðu uppi sem sigurvegarar í ár.
Fyrir úrslitaleikinn spáði ég því að Versló myndi leiða eftir hraðaspurningarnar en svo myndi MA síga fram úr og vinna keppnina. Það rættist nema að MA náðu öruggri forystu eftir hraðann og juku smátt og smátt við hana og sigruðu örugglega. Verslingar stóðu sig ágætlega en þei áttu einfaldlega ekki möguleika í gríðarsterka lið MA.

Eftir að við duttum út úr GB hélt ég að sjálfsögðu áfram að fylgjast með henni. Eftir að hafa séð hraðann hjá öðrum liðum hugsaði ég ávallt með mér: "Við hefðum rústað þeim í hraðanum og svo unnið keppnina." Síðan rann það jafn óðum upp fyrir mér að við rústuðum MA í hraðanum en töpuðum samt. Einnig hugsaði ég líka oft á þennan veg er ég sá MA: "Bara ef þríþrautin hefði verð aðeins öðruvísi eða Tryggvi í MA hefði ekki gert heimasíðu um Bern [sem Atli Freyr kallaði "Raufarhöfn Evrópu"]." En það þýðir ekki að vera að svekkja sig yfir svona hlutum.
Ég er alla vegana feginn að Gettu betur sé lokið í ár og þá get ég hætt að svekkja mig. MA verðskuldar titilinn fyllilega en á næsta ári ætlum við að vinna þessa keppni. Við eigum nú skilið smá heppni.

Án titils

Mikið getur Minesweeper verið ávanabindandi leikur.

Hneyksli hjá KR

Ég hef aldrei skammast mín jafn mikið og núna fyrir að hafa æft fótbolta með KR. Ástæðan er þessi. Það er alveg til háborinnar skammar að vera að niðurlægja konur á þann hátt sem gert var á Herrakvöldinu sem haldið var um daginn.
Ef einhver spyr, þá er ég núna Gróttumaður enda hef ég æft handbolta þar.

Enn ein getraunin

Ég veit að þetta er orðið þreytt. En mér leiðist en og aftur.

Hvaða menn eru þetta og fyrir hvað eru þeir frægir?
Magnús Þorlákur má ekki svara.

Fánagetraun

Í tilefni þess að mér leiðist hef ég ákveðið að setja inn aðra getraun



Hvaða fáni er þetta?

Getraun

Myndirnar tvær sýna leikara í hlutverki persónu úr Biblíunni.
Spurningin er tvíþætt. Hvað heitir leikarinn og hvaða persónu úr Biblíunni er hann að leika á þessum myndum?

Gettu betur

Þá er ljóst að við munum ekki hampa hljóðnemanum í ár eftir tap gegn MA 26-24. Við byrjuðum vel og náðum 5 stiga forystu í hraðanum en það dugði ekki. MA náði að jafna eftir fyrri vísbendingaspurningar og leiddi svo með tveimur stigum fyrir þríþrautina. Við vissum svarið við henni en svöruðum ekki því sem dómarinn vildi fá.

Ég verð að viðurkenna að það var nokkuð svekkjandi að tapa þessari viðuregn. Við vorum ekkert síðra lið en MA en heppnin var með þeim í kvöld. En MA-ingar voru bara góðir og það verður ekki tekið af þeim. Lið þeirra hefur ágæta reynslu enda voru tveir þeirra í úrslitunum í fyrra. Ég held að þetta lið vinni í ár.

Ég segi bara takk fyrir mig og óska MA-ingum góðs gengis í Gettu betur. Við mætum með óbreytt lið á næsta ári og þá munum við vinna.

Friðarsúlan

Yoko Ono ætar að setja upp friðarsúlu í Reykjavík, nánar tiltekið Viðey. Ég verð að segja að mér finnst þetta skemmtileg hugmynd. Friðarsúlan felur í sér góðan boðskap og mun setja skemmtilegan svip á borgina. Ég tel það vera heiður fyrir Reykjavík og Ísland að Yoko vilji hafa friðarsúluna í Viðey. En af einni ástæðu finnst mér ekki rétt að hafa hana á landinu. Mér finnst það ekki fara saman að hafa þessa friðarsúlu í landi með ríkisstjórn sem styður allan stríðsrekstur Bandaríkjanna í algerri blindni.
Ég vil þó að friðarsúlan rísi hér í Reykjavík. Hún samræmist draumum mínum um að Ísland verði boðberi friðar á alþjóðavettvangi.
Friðarsúlan mun passa vel inn í landið árið 2007 þegar Íslendingar verða búnir að kjósa sér vinstristjórn sem styður ekki stríð.

Lögmál Björns Reynis

Vegna mikillar sjálfsdýrkunnar verð ég að nefna eitt lögmál eftir mér.
Lögmál Björns Reynis hljómar svona:

Sama hvar þú ert, þú gleymir alltaf einhverju.

Gettu betur

Í kvöld sigruðum við ME 26-17. Við fórum reyndar illa af stað í hraðanum (að fara illa af stað í hraða er ansi taugatrekkjandi) en við náðum þó 20 stigum. Sigurinn var aldrei í hættu eftir hraðann.
Við erum því komnir í sjónvarpið og á morgun verður dregið í 8-liða úrslit. Það verður spennandi að sjá hverjir mótherjar okkar verða. Persónulega langar mig mest til að keppa á móti Versló af tveimur ástæðum. 1) Hafsteinn, vinur minn og gamall félagi úr Nema hvað? er í liðinu. 2) Gamli góði MR-ví rígurinn.
Annars skiptir það litlu máli hverja við fáum í 8-liða úrslitum.
Í lokin verð ég að viðurkenna að það er ansi skrýtið að keppa við lið sem er ekki á staðnum.

Týnt veski

Ég veit að ég segi þetta oft en veskið mitt er týnt. Í þetta skiptið er það ekki í skólatöskunni minni. Ég er farinn að hafa verulegar áhyggjur.

Ágætis byrjun

Þá er fyrsta keppnin búin. Þetta var bara nokkuð öruggt hjá okkur, 26-5. Ég er bara sáttur.

Einn liðsmaður FB var ekki svo ólíkur Frank.

Nú er nóg komið!

DV er ljótur blettur á samfélaginu. Eftir að sjálfsmorð er framið, í kjölfar frétt þess, standa ritstjórar blaðsins fast við sína stefnu og sýna engin merki um iðrun og ábyrgð. Ég er farinn að efast um að þeir séu mannlegir. Ritstefna DV verður seint talin mannúðleg. Sjálfsmorðið er afleiðing hennar og ætti önnum að vera ljóst hversu hættuleg hún getur verið.

Ef þið eruð ekki nú þegar búin að skrifa undir hvet ég ykkur til að gera það strax.

Án titils

Það var bara nokkuð gaman að mæta aftur í skólann í dag. Cösukjallarinn hefur verið opnaður en hann hafði verið lokaður frá því ég byrjaði í MR. Skólaþorpið hefur tekið á sig nýja mynd og stemmingin er öðruvísi í skólanum. Ég verð þó að viðurkenna að ég hálfsakna kakólandsgámsins. Ég held að ég sé einn um það.

Nýjustu tíðindin eru svo þau að við mætum Fjölbrautarskólanum í Breiðholti í fyrstu umferð í Gettu betur. Viðuregnin fer fram þann 16. janúar kl. 20:00 í útvarpshúsinu. Mér líst bara nokkuð vel á þessa viðuregn.

Þorláksmessuhugleiðingar

Jólin í ár hafa á einhvern hátt farið algerlega fram hjá mér. Mér finnst alltaf skrýtið þegar Þorláksmessa rennur upp og einn dagur er til jóla. Í ár er það enn skrýtnara. Mér finnst jólin alltaf vera langt framundan þó þau hefjist á morgun.
Ég hef ekki farið mikið í bæinn fyrir jólin nema í dag. Þá fór ég að syngja með MR-kórnumn á nokkrum stöðum niður í bæ. Það er alltaf stemming í bænum á Þorláksmessu og þess vegna gaman að syngja þar jólalög. Einnig fór ég í friðargöngu en fyrir mér er það ómissandi þáttur á Þorláksmessu. Svo erum við nýbúin að skreyta jólatréið.
Ég er því núna farinn að gera mér grein fyrir því að það er ansi stutt í jólin.

Jóladagatalið

Það hefur verið hefð í fjölskyldunni síðan ég man eftir mér, að setja upp jóladagatal (sjá mynd til vinstri) þar sem 24 pokar, einn fyrir hvern dag fram að jólum, eru látnir hanga og mamma eða pabbi laumar einhverju sætu í pokanna handa okkur systkinunum. Í gamla daga stilltum við Nanna og Bjarki okkur upp fyrir framan dagatalið og tókum spennt upp úr pokunum. Það hefur lítið farið fyrir þessari hefð undanfarin ár enda erum við orðin eldri og Bjarki fluttur að heiman. Dagatalið hefur þó alltaf verið til staðar og höfum við Nanna tekið upp úr pokunum þegar okkur hentar þó að hinn aðilinn sé ekki viðstaddur.



Mamma vill ólm halda í hefðina og sagði við mig um daginn að nú væri kominn tími á að setja upp jóladagatalið. Ég benti henni á að þessi hefð væri deyjandi. Hún ákvað því að við skyldum öll taka upp úr pokunum saman eins og í gamla
daga. Hún hefur m.a.s. bryddað upp á þeirri nýjung að láta spurningar fylgja með. Þá fáum við Nanna hvor okkar spurningu. Spurningin sem Nanna fékk var svona:

"Jónas Hallgrímsson, Tómas Sæmundsson og Konráð Pétursson. Hvern vantar í þennan hóp?"

Eins og glöggir menn taka eftir þá passar Konráð Pétursson ekki inn í þennan hóp. Þarna hefði auðvitað átt að standa Konráð Gíslason (eða Brynjólfur Pétursson). Þannig að Nanna gat auvitað ekki svarað þessu. Ég benti mömmu á þessa vitleysu. Þá játaði hún að hafa ekki samið þessar spurningar. Þetta var víst spurning úr forprófi fyrir Meistarann, nýja spurnangaþáttinn hans Loga Bergmanns Eiðssonar. Forprófið hafði verið skilið eftir í Hagaskóla, þar sem mammaa vinnur, en þar var forprófið haldið. Þaðan má rekja þessa villu. Annars held ég að Nanna sé ekkert allt of hrifin af þessari nýjung.

Þessi hefð lifir þó enn og Bjarki kemur heim 17. des. og mun taka upp úr pokunum með okkur þá. Það eru líka fleiri hefðir í kringum jólin eins og laufabrauðagerð, sem enn lifa. Hefðirnar lifa enn.

Óreiða

Ég held að óreiða sé náttúrulegt ástand herbergisins míns.

Nýr spyrill

Það víst búið að ráða Sigmar Guðmundsson sem spyril í Gettu betur. Mér líst bara ágætlega á hann. Ég hefði nú samt alveg viljað sjá konu sem spyril og karlkyns stigavörð, svona til tilbreytingar.

Óður til hinna týndu hluta.

Það er alltaf einhver hlutur týndur. Núna er það veskið. Auk þess gleymdi ég húfu í Verslunarskólanum á MR-ví deginum (reyndar er það svolítið langt síðan).

Ég er viss um að þetta var hér allt í gær!

Án titils

Stundum getur verið of auðvelt að plata mig í einhverja vitleysu.

Án titils

Það er alveg ótrúlegt hvað sum lög, notuð til tungumálakennslu, geta síast inn í heilann til skamms tíma, hvort sem þau eru góð eða léleg.

Án titils

Hversu oft skyldi ég hafa heyrt þessa spurningu hljóma (aðallega frá stúlkum): "Hva, manstu ekki mér?"

Húrra, húrra, húrra!

Davíð er að hætta!

Forprófið 2

Í dag voru niðurstöður forprófsins birtar í Gamla skóla. Ég varð alveg steinhissa þegar ég sá nafn mitt efst á listanum með 168 stig, eða 8 stigum á undan næsta manni. Ég hélt í fyrstu að þetta væri eitthvert busagrín og er enn að velta því fyrir mér. Ég átti sko alls ekki von á þessu og eins og þið, lesendur vitið þá var ég mjög svartsýnn í gær. Nú er spurning hvort að þetta þýði endanlega að ég hætti í handboltanum en ég hef verið að gefa það í skyn að undanförnu. En ég ætla ekki að vera að ákveða það núna.

Forprófið

Í dag gerði ég heiðarlega tilraun til að komast í lið MR í Gettu-betur. Stefnan var sett á liðsstjórasætið. Mér gekk sæmilega á prófinu en ég er þó ekkert viss um það hvort ég nái takmarki mínu en lifi í vonini. Ég klikkaði á sumum hlutum sem ég átti hreinlega að vita. Ég verð bara að gera betur næst.

MR-kórinn

Ég reyndi fyrir mér í söng í dag þar sem prufur í MR-kórinn fóru fram. Þegar ég kom inn hafði ég ekki hugmynd um hvað ég væri að gera þarna syngjandi "mo-mo-mo". Ég náði tónunum ekkert allt of vel og datt m.a.s út um tíma. Þá sagði hann bara að ég væri góður bassi og ég á að mæta á mánudaginn.
Mun ég standa undir væntingum?

Bandaríkin og SÞ

Eiga Bandaríkin heima í SÞ? Maður spyr sig.

Fyrsta vikan

Þá er fyrsta vikan í MR liðin. Hún hefur liðið bara mjög hratt enda gaman í MR. Það er ágætt að vera alltaf í sömu litlu stofunni. Ég er aðeins farinn að kynnast bekkjarsystkinum mínum og við Sindri erum þegar byrjaðir í kosningaslag um embætti bekkjarráðsmanns 3-A.
Félagsaðstaðan er lokuð. Ekki alveg draumabyrjun þar en það lagast. Einnig finnst mér ágæt úti stemmingin sem myndast gjarnan á portinu á milli Íþöku og íþróttahúsins.
Busakynningin var ágæt. Ég slapp reyndar við að vera tekinn upp á svið. Ég þurfti ekki einu sinni að segja "heyjó". Svo er það bara busadagur framundan. Það verður bara nokkuð gaman.
Svo er ég að í huga að ganga í MR-kórinn eftir að hafa heillast af flutningi hans á Bohemian Rapsody á skólasetninguni. En það stangast á við handboltann. Hvað á ég að gera?
Það eru góðir tímar framundan.

Og fyrir þá sem kvarta yfir spillinum um Harry Potter, ég varaði ykkur við.

X-V í staðinn fyrir R

Það hefur ekki farið framhjá mörgum að R-listinn úr sögunni. Eins og menn vita vorum það við Vinstri-græn sem tókum af skarið og ákváðum að fara í sérframboð. Sumir vilja kenna okkur um að hafa kálað R-listanum og aðrir segja að við hafi málað okkur út í horn. R-listinn er orðið dautt stjórnmálaafl og flokkarnir hættir að ná saman. Einhver að taka af skarið og slíta þessu endanlega. Ég hef alveg trú á því að VG verði áfram við stjórn sama hvað aðrir segja. Það er hægt að byrja kosningabaráttuna með því að losa okkur við allar mýturnar.

Bókagagnrýni

Eftir gott sumarfrí frá blogginu hef ég ákveðið að snúa aftur með smá bókagagnrýni. Bókin er Harry Potter and the half-blood prince.

Í þessari sjöttu bók um Harry Potter fær hann námsbók í töfradrykkjum sem hinn dularfulli blendingsprins átti, Prinsinn hefur skrifað uppskriftir og galdra í bókina, Harry til mikillar lukku - og vandræða. Á sama tíma grunar hann Draco Malfoy um eitthvað ráðabrugg og skyggnist inn í fortíð Voldemorts.

Varúð:spillir hérna
Mér finnst bókin vera nokkuð svipuð og næsta á undan henni. Í upphafi er býst maður við mikilli spennu en svo tekur við frásögn um daglegt líf Harrys og ekkert spennandi gerist fyrr en í síðustu köflunum. En síðustu kaflarnir voru þó spennandi. Nú kemur spillir. Snape drepur Dumbledore. Það hefur gríðarlega mikið að segja fyrir bækurnar enda Dumbledore ein mikilvægasta persóna bókanna og nú veit maður loksins hvort Snape er góður eða vondur. En í heildina séð ekkert sérstök. Bókin er þó aðeins styttri sem er ágætt enda enginn þörf að skrifa svo lngar bækur ef það gerist ekki mikið í þeim.
Nú ætlast ég hreinlega til þess að Rowling bæti upp fyrir síðustu tvær bækur og klári þessa bókaröð almennilega.

Sumarið er gúrkutíð... eða nær oftast

Það gerist á sumrin að skrif á þessa síðu minnka stórlega. Af hverju? Jú, það gerist bara svo lítið frásagnahæft þá og ekki er mikið í fréttunum.
Því miður hafa hryðjuverkamenn séð fjölmiðlum fyrir nóg af efni með andstyggilegri árás á saklaust fólk sem aldrei gerði þeim mein. Bush og félagar sögðu líka að heimurinn væri öruggari eftir Íraksstríðið. Hver trúði því svo sem.

Það kom mér ekki á óvart þegar ég heyrði í fréttum að landamæragæsla væri hert. Ástæðan kom mér hins vegar á óvart. Að það skuli vera gert af ótta við mótmælendur sem vilja mótmæla mestu skemmdarverkum Íslandssögunnar. Ég stoppaði aðeins við mótmælabúðirnar um daginn. Það var heldur lítið að gerast enda var stór hópur af fólki nýfarinn. Ég vildi gista þarna en Pabbi og vinur hans sem ég ferðaðist með vildu það ekki. Ég skil heldur ekki þær áhyggjur lögreglunnar af því að á SavingIceland.org er fólk hvatt til að koma og mótmæla. Það er bara hluti af baráttu að fá fólk til að koma og sýna samstöðu með málefninu. Það skaðar heldur ekki að fá fleiri mótmælendur, jafnvel þó þeir séu anarkistar (þeir gera nú ekki mikið af sér í auðninni). Annars tel ég anarkista ekki líklegasta hópinn til að koma og mótmæla.
En löggan er þó ekki enn búinn að handtaka neinn og vísa burt vegna mótmæla. Það er gott

Annars var hálendisferðin bara ágæt. Við gengum m.a. á Snæfell, hæsta fjallið utan Vatnajökuls og ég fékk að keyra nokkuð mikið enda kominn með æfingaleyfi. Svo mun ég vera á Flúðum næstu vikuna og mun ég vinna eitthvað í garðyrkju þar áður en ég sný aftur til vinnu í Neskirkju.

Kominn heim.

Þá er maður kominn aftur heim til Íslands. Ég var farinn að sakna landsins. Granollers er ekki skemmtilegur bær. Þegar maður var ekki að spila handbolta var mjög lítið að gerast. Við kepptum 5 leiki á mótinu. Við byrjuðum á því að gera dramatískt jafntefli á móti Visoko frá Bosníu þegar Ægir skoraði frá miðju á síðustu sek. Svo töpuðum á móti spænsku liði, unnum tvö spænsk og töpuðum síðan á móti Herulf frá Noregi og komust ekki upp úr riðilinum. Þegar mótið var búið fórum við í skemmtigarð og svo til bæjarins Calella þar sem við dvöldum síðustu daga. Einnig var farið til Barcelona einn daginn en það olli mér hins vegar vonbrigðum að geta ekki skoðað Sagrada Familia-kirkjuna. Það þýðir að ég þarf að koma aftur til Barcelona einhvern tíman seinna.

Í heildina litið er finnst mér ekki gaman að fara í keppnisferð til Spánar. Spánn er áhugavert land en maður er of bundinn af hópnum. Svo er líka allt of heitt þar. Frekar vil ég fara til Danmerkur eða Svíþjóðar. Ef ég er spurður hvort ég vilji fara aftur í keppnisferð til útlanda þá myndi ég segja nei. Frekar vil ég fara til útlanda á eigin vegum.
Hér er svo ferðasaga frá Arnari þjálfara

Ég er reyndar nokkuð svekktur yfir því að hafa misst af brúðkaupi Nönnu, frænku minnar sem var haldið í Viðey. Sérstaklega þegar ég las umfjöllun frá Frank. En stundum verð ég að fórna einhverju.

Aftur til jarðar?

Í dag barði vottur Jehóva á dyr hjá mér. Hann virtist mjög áhugasamur um dauðann og upprisuna. Hann spurði mig hvort ég trúði því að ástvinir gætu snúið aftur á jörðina og fór svo að tala um það dáið fólk gæti snúið aftur til jarðnesks lífs. Svo gaf hann mér tímarit votta Jehóva, Varðturninn.
Í blaðinu voru þessar hugmyndir kynntar. Þetta voru um 30 bls. og verð ég að viðurkenna að stundum skildi ég ekki alveg hvað þeir voru að fara. Dæmi úr biblíunni voru mjög áberandi.

Ég hef lítið út á þá að setja. Mér finnst ekkert að því að þeir banki upp á hjá fólki. Það er bara þeirra aðferð til að boða trúna. En ég get ekki sagt að ég sé sammála þeim. Ég er sáttur við trúarskoðanir minnar kirkju.

Svo langaði mig að koma með könnun þrátt fyrir að hafa fengið dræmar undirtektir síðast þegar ég setti kannanir inn.

Ekki lengur Hagskælingur!

Þá er ég loksins útskrifaður úr grunnskóla. Fyrir þetta tímabil setti ég mér tvö markmið.

1. Að ná 9 eða hærra á samræmdu prófunum. Því miður náði ég því markmiði ekki þar sem ég fékk 8,8 í meðaleinkunn. Það var enskan sem dróg mig niður en ég fékk 7,5 þar. Það var hlustunin sem dróg mig niður þar sem ég var hálf sofandi og athyglisgáfan ekki í lagi. Hins vegar fékk ég 10 í stærðfræði og er mjög sáttur við það. En ég mun komast í MR og það skiptir mestu máli.
2. Að vinna Nema hvað?. Markmiðið náðist. Við unnum keppnina eftir að hafa lagt Laugarlækjarskóla, Húsaskóla, Landakotsskóla (tvisvar) og Austarbæjarskóla að velli. Þórður Sævar og Hafsteinn sátu við hlið mér í liðinu og Ari Bragi og Sindri sáu um ræðurnar. Ekki má svo gleyma Ara Eldjárn og Helga Hrafni sem þjálfuðu okkur í ár og stóðu sig með prýði.
   

Ég var að spá í að rita Hagaskólaannál hér en hætti svo við. Í raun gerðist lítið hjá mér fyrir utan NH. En þessu lauk nú öllu saman með þessari útskrift í dag sem var bara ágæt.

Nú tekur framhaldsskólinn við. Ég er löngu búinn að sækja um í MR og hlakka bara til að byrja í honum. Ég stefni að því að taka þátt í Gettu betur einhvern tímann í framhaldsskóla og er NH góður undirbúningur.

Nú er maður ekki lengur Hagskælingur. Bara fyrrverandi Hagskælingur

Stígvélland

Rakst á áhugaverða grein á Djöflaeyjunni í dag. Hún fjallar um klikkaðan Belga sem vill útrýma tökuorðum út úr íslenskunni. Sum orðin eru ágæt, önnur ekki eins skemmtileg og enn önnur mjög skopleg. Dæmi: Ítalía nefnist Stígvélland. Framvegis ætla ég að nota það orð hér á vefdagbókinni minni. Þó að hann sé svolítið klikkaður er það samt gaman þegar útlendingar sýna málinu áhuga og vilja bæta það.

Stars Wars: 3. kafli

Ég var að sjá síðustu Star Wars myndina, Revenge of tthe sith. Í umfjöllun minni hér á eftir gæti ég spillt fyrir þeim sem ekki hafa séð myndina.

Mér fannst myndin fara full geyst af stað. Hún byrjaði á full miklum hasar sem að mínu mati var óþarfur. Atriðið snerist um að frelsa Palpatine kanslara og það tókst, meira að segja var Dooku greifi veginn sem að vísu þjónaði sínum tilgangi. Þeir hefðu alveg geta sleppt atriðinu og látið greifann deyja í 2. kafla.
Eftir þennan endalausa hasar í byrjar svo sagan að ganga. Kastljósið beinist að Anakin Skywalker sem er stútfullur af tilfinningum. Á meðan gerist hann dyggur aðstoðarmaður kanslarans, sem er auðvitað Sith-meistarinn Darth Sidious, sem snýr honum gegn Jedi-riddurunum og býður honum mátt til að bjarga Padmé, heitelsaðri eiginkonu hans, frá Dauðanum.
Fyrri hlutinn finnst mér heldur langdreginn og ber mikinn keim af kafla 2 þar sem tilfanningasveiflur Anakins eru ráðandi. Yfir höfuð er hann ekki neitt sérstakur. Seinni hlutinn er hins vegar mun betri.

Myndin tekur stefnubreytingu þegar Anakin gengst Sidious endanlega á vald. Þá byrjar sagan að ganga og tengja nýju myndirnar við þær gömlu. Kanslarinn tekur endanlega yfir Lýðveldið og gerir það að keisaraveldi. Næst losar hann sig við alla Jedi-riddarana. Sú sena er dramatísk og aftökurnar minntu sumar á aftökur nasista á gyðingum á götum gettóa. Anakin verður endalega að illmenni og drepur síðan ástina sína með illskunni sem hann ætlaði að nota til að bjarga henni. Það er hins vegar gaman að sjá hvernig hann tekur endanlega á sig mynd Svarthöfða eftir að hafa brunnið illa í bardaga við Obi-Van Kenobi.
Þessi seinni hluti myndarinnar er bara nokkuð ágætur.

Í heildina séð er þessi mynd mun betri en kafli 1 og 2. En hún stendur gömlu myndunum langt að baki. Nýju myndirnar geta einfaldlega ekki keppt við þær gömlu. Þær gömlu eru einfaldari og minna um tilfinningaflækjur. Sagan fær virkilega að njóta sín og myndirnar eru ekki ofhlaðnar tæknibrellum. Bardagaatriðin eru ekki ofhlaðin leysigeislum. Svo hafa gömlu myndirnar líka betri húmor. Í þessari mynd var lítill húmor, jafnvel áður enn Jedi-slátrunin hófst. C-3PO og R2D2 voru þarna en fengu lítið að njóta sín. Það var líka gaman að sjá Chewbacca aftur þó hann fengi síður að njóta sín (enda enginn Han Solo með honum).

Ég verð reyndar að viðurkenna það að þessar myndir eru líka mikilvægar fyrir söguna í heild sinni. Það vantar bara ódauðleikann frá gömlu myndunum.

Án titils

Barátta menntaskólanna um mig harðnar stöðugt. Nýjasta tilboðið er frá MH-ingi og mun ég fá dóp kjósi ég að fara í MH. Nú er bara spurning hvað verslingar geri til að toppa það. En ég breyti umsókninni ekki þrátt fyrir það.

Rafræn umsókn.

Þá er ég búinn að sækja um framhaldsskóla. Ég gerði heiðarlega tilraun til þess í gær en þetta kerfi var eitthvað gallað. Þá hringdi ég í menntamálaráðuneytið og gerði athugasemd. Ég var greinilega sá fyrsti sem gerði athugasemd. Þeir sögðust hafa fullreynt þetta kerfi. Þá ályktaði ég að þetta kerfi væri ekki forritað fyrir Firefox. Enn eitt óþolandi dæmi þar sem ekki er tekið tillit til minnihlutans. En ég gekk frá þessu í dag á skrifsto móður minnar. Það kemur fæstum á óvart að ég sótti um inngöngu í MR. Ég sótti um málabraut og náttúrufræðibraut til vara og frönsku sem þriðja mál. MH hafði ég sem varaskóla og sótti ég þar um félagsfræðibraut en málabraut til vara og svo rússnesku sem þriðja mál. Ég hlakka bara nokkuð mikið til að byrja í MR.

Án titils

Ef þú spyrð Dorit þá hjálpar Ólafur viðskiptalífinu til þess að...

Gamli góði Hreppurinn

Það er alltaf jafn yndislegt að koma í gamla góða Hrunamannahreppinn til að slaka á. Ég ákvað að halda þangað með foreldrum mínum þar sem næsta próf er ekki fyrr en á þriðjudag. Ég sakna alltaf gömlu góðu daganna þegar ég hljóp um hóla og hæðir á jörð Hruna og stríddi kindunum og hænunum inn á milli.

Hrunakirkja í allri sinni dýrð.
Því miður sést ekki í húsið sem ég bjó í en ég ætla að reyna að finna betri mynd

Ég er græningi!

Ég ákvað að taka þetta próf bara til gamans.

You scored as Green. <'Imunimaginative's Deviantart Page'> Green 100% Democrat 92% Socialist 92% Anarchism 67% Communism 58% Nazi 17% Fascism 8% Republican 0% What Political Party Do Your Beliefs Put You In? created with QuizFarm.com

Niðurstöðurnar koma mér ekki mikið á óvart. Ég veit reyndar ekki hversu marktækar þær eru þar sem ég skildi ekki allar spurningarnar. Eitt kom mér reyndar á óvart. Það er hvað demókratar eru ofarlega á lista.

Sitt af hverju tagi

Nú er ég búinn að þreyta fjögur samræmd próf. Mér hefur gengið ágætlega. Ég get ekki staðist það að blogga núna. Það er erfitt að vera í bloggbindindi þegar eitthvað frásagnarhæft gerist. Samræmdu prófin hafa vakið einhverjar óánægju raddir eins og venjulega. Núna fyrir ritun í íslensku sem þótti of pólitísk. Mér fannst það ágætt að geta komið skoðunum mínum á framfæri. Ritunin snerist um að taka afstöðu með eða á móti styttingu framhaldsskólanna. Ég tók auðvitað afstöðu gegn styttingunni.


En svo hefur ýmislegt gerst út í samfélaginu. Gunnar Örlygsson hefur yfirgefið frjálslynda flokkin og gengið til liðs við sjálfstæðismenn. Mér finnst þetta vera nokkuð asnalegt. Sjálfstæðisflokkurinn fær þarna aukaþingsæti frá kjósendum frjálslyndra. Það eru ekki margir gallar á lýðræðinu okkar en þetta er einn slíkur. Það ætti að breyta lögunum þannig að þingsæti tilheyri flokkum en ekki einstaklingum því það eru flokkarnir fólkið kýs.

Svo kom út nýtt blað sem fékk nafnið "Blaðið". Ég hef verið að skoða þetta blað og mér finnst það hálf innihaldslaust. Auglýsingar skipa mjög stóran sess í blaðinu. Inn á milli er litlum fréttum og örðum greinum, oft með myndum sem taka meira pláss, troðið inn. Blaðið er auglýst sem frjálst og óháð blað og sést það vel enda alls engin þjóðfélagsumræða í því. Svo er þeir heldur seinir með fréttirnar sem er furðulegt því blaðið berst heim til manns með póstinum um miðjan dag Ég hef þó tekið eftir einu. Á dagskrársíðum blaðsins eru bloggfærslur um sjónvarp birtar. Ég er sem betur fer óhultur því að þeir taka bara niður af blog.central.is síðum. Í heildina séð: Lélegt blað.

Nú ætla ég að hugsa um það sem er framundan. Það er svo margt til að hlakka til.

Der Untergang

Ég var að sjá hina átakanlegu mynd "Der Untergang" áðan. Myndin fjallar um síðustu daga Hitlers í neðarjarðarbyrginu og ástandið þar og á götunum í Berlín. Myndin er bara mjög góð og átakanleg, ég veit ekki hvar ég á að byrja eða hvað ég á að segja yfir höfuð.

Ég á það til að vorkenna hinum mestu illmennum. Um tíma fann ég til með Hitler þegar honum leið illa (dæmið mig bara) en ekki lengi þar sem Hitler var alveg snauður af miskunasemi og samúðarkennd. Ég hef aldrei séð mynd frá hans sjónarhorni (The Great dictator er ekki talinn með þar sem hún sýnir óraunveralega en þó skemmtilega mynd af Hitler). Ég fór í byrjun að velta því fyrir mér hvort það leyndist eitthvað gott undir þessu illmenni, eftir allt þá var hann einu sinni saklaust barn. Eftir því sem leið á myndina sá ég að svo var ekki. Hugmyndafræði hans var hrein illska. Um helförina vita allir. Svo er það líka það hugarfar að gefast ekki upp í vonlausri stöðu þrátt fyrir að fleiri saklausir borgarar myndu deyja, réttlæta það með því að segja að þeir væru aumingjar og ásaka þá sem vildu gefast upp, um landráð. Það var heldur engin sorg þegar hann drap sig. Vogið ykkur ekki að halda að ég líti upp til hans hafi það verið einhver vafi.

Svo var það fólkið í kring um hann. Sumt af því sýndi mikla hollustu við hann. Eva Braun var honum alltaf hundtrygg og dó með honum eins og menn vita. Svo var það frú Goebbels með öll sín saklausu börn sem dýrkuðu "Hitler frænda" án þess að vita um illsku hans. Ég vorkenndi þeim svo mikið, á því leikur enginn vafi. Þegar nasisminn var að hrynja áttu þau ekki að fá að lifa bjarta framtíð án hans. Þess vegna drap hún börnin með blásýru þegar þau sváfu.

En svo eru það auðvitað óbreyttu borgararnir sem þurfa að upplifa helvítið á götunum. Og auðvitað var Hitler sama um þau. Stríð er bara helvíti á jörðu og ég skil ekki hvernig mönnum dettur í hug að vera að heyja stríð hvor við annan. Það vita líka allir að enginn vinnur í stríði, það tapa allir.

Það er svo margt sem ég get sagt um þessa mynd og örugglega eitthvað sem vantar. Ef það eru einhverjar villur í þessum pistli þá leiðréttið þið mig bara. Reyndar verð ég ekki mikið á netinu á næstunni út af prófunum og veit því ekki hvort ég geti svarað öllum athugasemdum. Svo má líka vel vera að pistillinn verði mistúlkaður. Það verður þá bara að hafa það.

Ég á enn afmæli !

Mér finnst skrýtið að af öllum dögum ársins þá er afmælisdagurinn minn í dag. Og áður en ég veit af, þá er hann liðinn. Annars eru afmælisdagar ekki jafn skemmtilegir og þegar maður var lítill. Í raun eru þeir eins og hver annar dagur þegar maður er orðinn 16 ára (eða 21 árs).

Ég á afmæli í dag.

Ég er víst aðeins eldri en ég ætlaði mér. Ég á nú bara að vera 16 ára.

You Are 21 Years Old

21 Under 12: You are a kid at heart. You still have an optimistic life view - and you look at the world with awe. 13-19: You are a teenager at heart. You question authority and are still trying to find your place in this world. 20-29: You are a twentysomething at heart. You feel excited about what's to come... love, work, and new experiences. 30-39: You are a thirtysomething at heart. You've had a taste of success and true love, but you want more! 40+: You are a mature adult. You've been through most of the ups and downs of life already. Now you get to sit back and relax.

What Age Do You Act?

Haffi frumkvöðull

Haffi er núna kominn með útvarpsblogg. Eitthvað sem ég hef ekki séð áður á netinu. Það má segja að hann sé frumkvöðull. Endilega kíkið á síðuna.

Plant með klukkutíma fyrirvara

Kl. 19:00 í gærkvöldi var ég farinn að sjá svolítið eftir því að hafa ekki nælt mér í miða á Robert Plant. Þá fékk ég óvænt boðsmiða á tónleikana. Helga, frænka mín vinnur á Þingvöllum og hitti Plant og hljómsveit hans er þeir heimsóttu staðinn. Helga fékk svo boðsmiðana og einhvern bláan "after show" miða. Svo var haldið á tónleikana ásamt mömmu, Helgu og Bíbí, dóttur hennar. Tónleikarnir voru ágætir. Ég var reyndar ekki að búast við miklu enda er þetta nú ekki Led Zeppelin. Hann tók lög frá sólóferli sínum í bland við gömul Led Zeppelin lög. Ég hafði mest gaman að indí-ballöðunum. Svo voru rokklögin líka góð. Það var reyndar eitt sem kom mér á óvart. Ske hitaði upp. Annars var fátt sem kom mér á óvart enda vissi ég ekki á hverju ég ætti von. Það eina sem ég bjóst við var að hann tæki "Innflytjendasönginn" sem hann gerði (að vísu í rólegri útgáfu en venjulega). Eftir að tónleikunum var lokið fórum við að hitta Plant. Við fórum inn í eitthvað herbergi þar sem hann var ásamt fleiru fólki. Svo ætlaði einhver íslenskur karl að reka mig, mömmu og Bíbí út. Þegar við vorum á leiðinni út kom einhver annar karl sem var með Plant og sagði eitthvað í þessa áttina: "Wait, these people are with Helga." Og við fengum að koma aftur inn. Svo hitti ég Plant og tók í höndina á honum. Já, ég er ekki að ljúga, ég tók í höndina á Robert Plant. Ég er í sjöunda himni. Kvöldið var fullkomið.

Báráttunni er ekki lokið

Ég gladdist mikið þegar ég frétti um hóp breskra umhverfissinna sem eru að skipuleggja alþjóðleg mótmæli gegn Kárahnjúkavirkjun. Þeir reka síðuna www.savingiceland.org. Þeir hafa mikinn áhuga á íslenskri náttúru ólíkt mörgum Íslendingum sem eru blindari en nýfæddir kettlingar fyrir náttúrunni. Þeim er líka annt um ímynd Íslands sem ríkisstjórnin gerir sitt besta til að spilla. Ég hvet ykkur til að kíkja á síðuna.

Benedikt 16

Þá eru kardinálarnir búnir að velja sér nýjan páfa. Mér líst ekkert allt of vel á hann. Hann er of íhaldssamaur. Nokkur dæmi

• Afstaðan gegn samkynhneigðum. Hvað er að hommum og lesbíum? Samkynhneigðir eru líka fólk.
• Afstaðan gegn getnaðarvörnum. HIV, þarf ég að nefna meira til að sýna að þessi afstaða er rugl
  
• Afstaðan gegn því að konur fái að vera prestar. Bara eitthvað rugl sem kaþólska kirkjan tók upp á tímum þar sem konur voru kúgaðar og hefur ekkert að gera með biblíuna.
• Afstaðan gegn öðrum kristnum trúfélögum. Hann heldur að kaþólska kirkjan sé eitthvað æðri en aðrar.
• Afstaðan gegn rokktónlist. Á karlinn sér líf? Rokktónlist er góð tónlist Hann ætti að sjá Jesus Christ Superstar.
• Hann vill sporna gegn fækkun í kaþólsku kirkjunni með íhaldssemi. Það er bara fyndið.

Ekki myndi ég nenna að vera páfi. Það hlýtur að vera leiðinlegt starf.
En eftir allt þá er páfinn bara venjulegur maður þó sumir haldi að hann sé eitthvað meira.

Án titils

Fréttablaðið vitnaði í mig í dag. þeir tóku brot úr pistli mínum um heimsóknina í Versló og birtu í einni frétinni. Þetta er reyndar ekki í fyrsta skipti sem þeir vitna í mig. Þeir tóku einnig brot úr grein minni um kennaraverkfallið sem ég skrifaði á vinstri.is í september. Já, fréttablaðið er greinilega eitthvað hrifið af mér.

Getraun.

Hvar á landinu er þessi mynd tekin?

Ég ætla í MR!

Vildi bara taka það skýrt fram hafi einhverjir haldið annað eftir síðasta pistil.

Verslókynning 2

Undanfarna daga hef ég mikið bloggað um framhaldsskóla. Ég ætla að halda því áfram hér. Tilefnið er heimsókn í Verslunarskóla Íslands og vegum Gettu-betur liðsins þar (bæði liðsmenn og þjálfarar). Það er margt sem hægt er að segja um þá heimsókn. T.d. þá erum við komnir með verndarengil í Versló, hann Stefán Einar.

Okkur strákunum úr Nema hvað liðinu var boðið í heimsókn í Versló ásamt strákunum úr Laugarlækjarskóla. Eins og lesendur hafa tekið eftir, þá hef ég verið mjög yfirlýsingaglaður og neikvæður í garð Versló. En þeir hringdu í Hagaskóla og ég talaði svo við einn þeirra sem vildi fá okkur og sagði hann mér að svarnir óvinir okkar yrðu þarna (ég vissi ekkert um hvað hann var að tala um).

En þá að kynningunni. Við byrjuðum á því að skoða bókasafnið og hittum þar Steinunni á bókasafninu sem er kona Einars skólastjóra. Þar hefur liðið einmitt góða aðstöðu enda bókasafnið glæsilegt.
Eftir það fórum við í græna salinn. Við fengum ágæta fræðslu um námið þar frá námsráðgjafanum og nóg af lesefni. Svo byrjuðu strákarnir að tala um gettu betur. Þeir buðu okkur upp á flatbökur og þær voru vel þegnar enda var ég banhungraður. Þeir eru mjög metnaðaðarfullir í gettu betur og gera allt til að fá okkur í Versló. Þeir buðu okkur gull og græna skóga. Má nefna skólagjalda- og einingaafslátt. Einnig töluðu þeir um það hvað við yrðum valdamiklir og öruggir í Versló og jafnvel æðri en aðrir("þið verðið ekki almennir 3.bekkingar"). Þeir hafa greinilega mjög góð tengsl við skólastjórnina.
Það sást alveg á þeim hverjir voru keppinautarnir. Það voru MR. Þeir skutu mest á hann og töluðu þeir eins og þeir væru hættir að geta eitthvað í GB. Einnig skynjaði ég smá hroka í garð allra hinna menntaskólanna (MR ekki meðtalinn) og mátti túlka að þeir væru eitthvað verri .Þer töluðu líka eins og þeir hefðu unnið keppnina 11 ár í röð og væru langbestir og að enginn annar skóli gæti unnið keppnina. En þrátt fyrir allt voru þeir ósköp vingjarnlegir, þeir vilja okkur vel og við náðum ágætlega saman yfir flatbökumáltíðinni.

Einn þeirra var þó áberandi leiðtoginn í hópnum, það var hann Stefán Einar. Hann er mjög staðfastur og einnig ögrandi. Það fór hins vegar í taugarnar á mér hvað hann var mikil karlremba. En talaði eins og stelpur gætu ekki tekið þátt í spurningakeppnum en bjargaði sér þó fyrir horn með því að segja að þær væru of samviskusamar í náminu sem er ekkert slæmt. Svo var það karlrembuhúmorinn. Hann talaði eins og ljóskur í Versló væru sjálfsagður hlutur handa okkur og einnig talaði hann um þær sem druslur eftir að ég hafði talað um druslur sem lélegar sjálfrennireiðar. Ég vona að stúlkur í Versló láti þetta ekki ganga yfir sig.
En það er einnig margt gott í fari hans. Hann veit auðvitað mjög mikið og sérstaklega fróður um guðfræðina. Hann spurði okkur hver yrði næsti páfi. Ég bjargaði mér með því að segja: "Ítalski kardinálinn." Einnig vill hann okkur ósköp vel. Hann hefur heitið okkur vernd í Versló. Þess vegna kallaði ég hann Verndarengilinn.

Eftir þessa heimsókn hafa fordómar mínir í garð Versló minnkað. Þeir hafa sannfært mig um að Versló sé góður skóli með gott fólk. Mér finnst það líka heiður að einn framhaldsskóli sé á höttunum á eftir mér. En ég ætla í MR og því fær engu haggað. Ég hef fjallað um þessa heimsókn með kostum hennar og göllum. Ég vil endilega heyra álit ykkar hvort sem þið eruð í Versló eða MR eða bara enn í grunnskóla. Ég lýsi hér með umræðuna opna. Takk fyrir mig.

Svefn

Ó, hvað það er yndislegt að sofa. Það er alsæla.

Án titils

Þegar einn geðsjúklingur fær íslenskan ríkisborgararétt koma fleiri slíkir og vilja líka ríkisborgararétt.

Leiðinlegur endir á Íslandsmótinu

Þá er þáttöku okkar á Íslandsmótinu í handbolta lokið. Við kepptum á móti FH í gær og er skemmst frá því að segja að FH-ingar eru betri en við. Við náðum okkur alls ekki á strik í gærkvöldi og ég er enn á þeirri skoðun að það á að banna leiki á föstudagskvöldum. Í dag kepptum við tvo leiki. Fyrri leikurinn var á móti HK. Sá leikur var spennandi en því miður töpuðum við með einumarki. Það var nú dómarinn sem réði úrslitunum í lokin með því að dæma löglegt mark af mér. Eftir tapið áttum við einn leik eftir sem skipti engu máli þar sem möguleikar um þriðja sætið voru úr sögunni. Sá leikur var gegn KA og við töpuðum enda höfðum við ekkert til að keppa um. Þannig að íslandsmótið er bara búið.

Veðrið

Hvað er eiginlega málið með þetta veður. Snjór og rok í apríl. Í svona veðri hugsa ég eitt: " En hvað það er yndislegt að vera hættur að æfa fótbolta."

Lengi lifi HC Andersen!

Í dag hefði HC Andersen orðið 200 ára. Ég kíkti aðeins á þessa hátíð sem var höfð til minningar honum. Það var greinilega mikið lagt í að gera þessa hátið sem glæsilegasta og ekkert sparað. Mér finnst eiginlega vera of mikill glamúr í kringum þessa hátíð. Óskarinn blikknar í samanburði við hana. Það er of mikið lagt upp úr því að fá einhverjar stjörnur í þetta. Mér fannst til dæmis algerlega óþarfi að hafa Tinu Turner þarna syngjandi lagið "Simply the best". Að vísu er lagið gott en hvað hefur það að gera með HC Andersen. Mér fannst stundum farið aðeins of mikið út fyrir efnið. Reyndar get ég ekki dæmt hátíðina til fulls þar sem ég missti athyglina og vissi varla út á hvað atriðin gengu of fann oftar en ekki tengslin við ævintýrin (hafi þau þá verið til staðar).
Ég get því vel skilið gagnrýni Dana í garð þessarar hátíðar. Með öllum herlegheitunum og stjörnunum fór kostnaður algerlega fram úr áætlun sem þýddi að minna fé fór í góðgerðarmálið, verkefnið gegn ólæsi, sem safnað var fyrir.

En nú vil ég frekar tala um Hans sjálfan. Ég hef haft mikið dálæti á honum síðan ég var krakki. Ég fekk áhugann efftir að hafa horft á teiknimynd um Ljóta andarungan. Það er reyndar svolítið kaldhæðnislegt að teiknimyndin var mjög mikið skálduð og brá m.a. fyrir einhverjum kanínum og krókódílum. Reyndar þá er mörgum teiknimyndum ,byggðum á ævintýrum hans, hagrætt fyrir börnin enda geta ævintýri hans verið átakanleg fyrir hjartað. Eftir að ég kynntist sögunni um Ljóta andarungann komu fleiri í kjölfarið og maður kynntist ævintýrum hans smátt og smátt. Svo fyrir nokkrum árum byrjaði maður að lesa nokkur ævintýri hans eins og þau eru skrifuð og þau eru mjög skemmtileg. Ég á að vísu eftir að lesa þó nokkur ævintýri eftir hann og ætli maður kíki ekki á einhver á næstuni og lesi mér til um ævi hanns sem ég hef fengið smá innsýn í. Mér finnst ég vita allt of lítið um hann miðað við dálæti mitt á honum.
Uppáhaldsævintýrið mitt mun ábyggilega vera Ljóti andarunginn. Sú saga snertir mann mikið og hvet ég aðra til að lesa hana óhagrædda.

Páfinn allur

Þá er Jóhannes Páll II allur. Hans tími er bara kominn. Hann var ágætur karlinn þrátt fyrir íhaldssemina. En það er alveg furðulegt hvað kaþólska kirkjan er að strita honum út. Það á nú ekki að æviráða menn í nokkur störf.Hann var orðinn svo veikur og samt hélt hann áfram eins og ekkert væri þar til nýafstaðna páska. Það á að leyfa mönnum að hvílast og njóta ellinar.
En það verður forvitnilegt að sjá hver næsti páfi verður. Og lýðræðið verður sko aldeilis varðveitt. Kannski við ættum bara að taka þetta kerfi upp í forsetakosningunum og allir yrðu sáttir.

Bobby vs. Dorit!

Meira um Bobby Fischer. Ármann, frændi minn, benti mér á þá kaldhæðnislegu staðreynd sem gleymdist í öllum látunum, að forsetafrúin er auðvitað gyðingur. Eins og alþjóð veit, þá er Bobby gyðingahatari. Hvað mun Bobby segja um hana? Það ætti þó að vera ljóst að hann fær ekki höfðingjalegar móttökur á Bessastaði.

Bobby eða herinn?

Annars verð ég að hrósa íslenskum stjórnvöldum fyrir að þora að standa gegn Könunum. Aldrei hefði ég trúað því að Davíð þyrði að rísa upp gegn Bush og félögum. Gaman það. Og hver veit til hvaða ráðs Kanarnir taka, kannski taka þeir bara herinn burt (og vonandi taki til eftir sig) og þá yrði ég sáttur.

Draumur

Mig dreymdi í nótt að ég hefði fengið 3 í einkunn fyrir ritgerð um John Stuart Mill og nytjastefnuna. Það er nú bara eins gott að sá draumur (eða martröð) rætist ekki.

Stefnubreyting hjá Bush eða bara brandari?

Scott McClellan, talsmaður hvíta húsinns:
Well, the President stands on the side of defending life.
Þetta var sagt um Bush forseta þegar talað var um mál Terri Schaivo. En hér er talað um líf almennt og þá fer ég að velta því fyrir mér hvort þetta sé einhver brandari. Ég væri gjarnan til í að heyra þessa setningu í umræðunni um stríð og dauðarefsingar. Yrði þetta sagt um forsetann? Ég held ekki. Er þetta kannski einhver stefnubreyting hjá honum að hætta að drepa? Ég tel það nokkuð ólíklegt. En við vonum það.

Kleppur er víða!

Já, þessi tilvitnun er auðvitað úr hinni stórskemmtilegu bók Englum alheimsins. Ég er nýbúinn að taka próf úr bókinni og gekk ágætlega í því. Það er gaman að velta sér upp úr þessari setningu og setja hana í samhengi við samfélagið og þá er alltaf hægt að finna einhvern Klepp út í bæ.

Það má kannski segja að kleppur hafi tekið sér bólfestu hérna þó að húsið sé vel upplýst á þessari mynd.

Það er alveg ótrúlegt hvað sama ríkisstjórnin endist lengi hér. Ætli þetta sé ekki 11. ár ríkistjórnarinnar hér. Hún lifir nú í sínum eigin heimi, hlustar allavegana ekki á þjóðina. Kannski húsið sé farið að gegna sínu upprunalegu hlutverki aftur.
Í dag fór ég að mótmæla fyrir utan húsið í dag.

Það byrjaði með því að við Ung Vinstri Græn bjuggum til mótmælaskilti í húsi VG. Svo fórum við með skiltin á Ingólfstorg þar sem fjöldi manna safnaðist saman til þess að mótmæla stríðinu. Þar var haldin smá dagskrá og svo haldið að stjórnarráðshúsinu með svartan borða þar sem nöfn fórnarlamba var nælt á. Borðinn var svo settur fyrir framan áðurnefnt hús. Mönnum var heitt í hamsi og lentu nokkrir upp á kant við lögguna. Alvöru mótmæli.

Þetta var liður í Alþjóðlegum mótmælum og hér er mynd af mótmælunum í London með tilheyrandi gjörningi. Þar væri ég til í vera.


Og svo aðeins í lokin: Höfnum stríði

Tap gegn Haukum

Vorum að keppa á móti Haukum áðan. Töpuðum með 5-6 mörkum. Við stóðum okkur mjög illa. Ég náði mér aldrei á strik og klúðraði færum í stað þess að skora. Við eigum að vinna þetta Haukalið en vorum bara hálfsofandi í kvöld. Það ætti að banna leiki á föstudagskvöldi.

Heróðir Kínverjar og Kanarnir, vá þeir eru bara snarruglaðir.

Var að lesa það hérna að Kínverjar séu að auka útgjöld til hermála og eyða 1.900 milljörðum króna í herútgjöld. Það er rugl! En svo hélt ég áfram að lesa fréttina og sá að Bandaríkjamenn eyða 25.200 milljörðum! Hvað er í gangi? Það er alveg ótrúlegt hvað menn eru eyða í hermál! Ég get rétt ímyndað mér hvað hægt er að gera fyrir slíka upphæð. Sem dæmi má nefna:

• Tryggt vatn og mat handa fátækum.
• Barist gegn sjúkdómum eins og malaríu og að maður tali nú ekki um alnæmi, með lyfjagjöfum og fræðslu.
• Losað börn undan þrælkunarbúðum stórfyrirtækja.
  
• Hugsað líka um ýmis innanlandsmál eins og heilbrigðismál, menntamál, umhverfismál og öll hin málin sem Bush ákvað að skera niður til að geta eytt meiru í herinn og lækkað skatta fyrir þá ríku sem hafa alveg efni á að borga sína skatta.
  

En það er alltaf á einhvern ótrúlegan hátt nægilegt fjármagn til að eyða í hermál eins og drápsvopn sem eru, sem betur fer, aldrei notuð enda óréttlætanlegt að nota þau. Það er bara ekkert gagn í því að eyða svo miklu í hergögn.